學子華神話齋「化妝就係…你落咗妝，我仲認得你，你落咗妝，我唔認得你，嗰啲叫做喬裝。」所以唔係個個女藝人都敢晒自己「真．素顏」！就好似無綫小花27歲黃心穎咁，佢就勁夠膽大晒自己個「真面目」，網民反應有讚有彈，又笑言似佢個「失散哥哥」蔡一智！不過落咗妝都認到佢，就證明佢真係靚底嘅！（相關新聞： https://goo.gl/drMUh5 ）喇…2字頭敢晒素顏就有心穎BB，咁唔同年齡層有邊個代表先，唔使諗即刻睇！！！
35歲鍾欣潼（阿嬌）
「中女」－係標籤啲過咗30又未婚嘅女人，依家仲誇張到踏入27歲就已經唔再係少女！但阿嬌就話你聽「變了大人仍是我」，仍是咁靚呀！即將36歲生日（1月21日）嘅佢，由Twins出道時期已經係靚女嚟，依家嘅佢都唔使「扮吓女神」唔使「戒掉稚氣」，因為佢真係好有「女人味」，係「真‧女人」但又好有少女味，你懂的！
45歲袁詠儀（靚靚）
獲得1990年港姐冠軍，有名你叫做「靚靚」，真係非浪得虛名！靚靚性格爽朗，有嗰句講嗰句，好多嘢都唔介意畀大家睇！之前佢就勁夠彊上咗個大陸綜藝節目，喺13億人面前揭露佢個廬山真面目，當住大家臉前落妝，點知真係令人嚇一跳，因為素顏嘅靚靚都係咁靚，有網民仲話佢唔化妝仲好呀！
50歲周海媚（海味）
堪稱「最美周芷若」，喺上年12月踏入5字頭，唔少人對佢當年「周芷若」一角表示「你是如此難以忘記」！不過，半百嘅佢其實一樣靚，佢經常大方喺網上晒出素顏照，皮膚Keep得好好！佢仲勵志Mode講過「覺得每個年紀都有每個年紀嘅美麗」，即使到80歲都可以一樣咁靚！
62歲林青霞
有「大美人」之稱，多年來都保養得好好，近年仲復出參與大陸綜藝節目，闊別幕前逾廿年嘅佢仲係咁靚，好似所飾演嘅「東方不敗」咁，內裏柔情，外表霸氣，真係冇得輸！咁素顏嘅佢，又係點呢？早前佢就去咗間大陸中學演講，當日打扮樸素，不施脂粉，嗰種魅力真係有錢都買唔到呀！
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|