頭先至喺訪問中話自己感覺好似「啲衫褲散開晒，覺得自己好似裸體咁，需要時間重組自己。呢個獎都係肯定自己一下。」嘅坤哥吳業坤，喺全年得一首《百姓》派台，竟然可以一舉摘下「我最喜愛的男歌手」……係冧莊!當時坤哥呆咗，佢摸摸下巴，然後完全不懂反應。大家拍晒手，但同時亦傳來喝倒彩，坤哥呆若木雞咁企起身，擰轉身、深深鞠躬。上台前，坤哥再行出去，又一次深深鞠躬。上年拎呢個獎時，佢話好後悔自己著咗條褲……今年，老老竇竇，坤哥真係冇諗過拎獎，拾級上台時，坤哥係慢慢行上去，好似仲係遊緊魂咁………定係震驚到冇力？坤哥深深透大氣，然後望一望個獎，聲震震問森美:「你有冇嘢幫我講你有冇嘢幫我講…」係咁追住森美問。然後又遊魂幾秒，先至話:「其實我想衷心講一句多謝……唉死啦…er……只係想講在座嘅每一位歌手朋友，都係好出色，今年我真係可以話係……過山車又好，不斷喺超速嘅紅van又好，或者……一程啦，今日係第二程。」然後想逐一致謝，但講唔夠幾句又「死啦」，dead air，腦海一片空白。當坤哥諗到要咩時，現場突然響起音樂，硬生生cut咗。然後飄來坤哥一句:「走啦。」
來源 source: http://s.nextmedia.com
|
鍾意就快D Share啦！
|
|
|
