今日下晝1點45分，戴住cap帽、一身casul look嘅阿倫譚詠麟，現身養和醫院，直上病房探因墮馬受傷嘅劉德華。逗留咗大約40分鐘，阿倫離開醫院接受訪問。對於華仔嘅傷勢，阿倫一開口，就講明今次唔係宣傳，所以只會講一次，阿倫話：「其實得我一個硬闖到上去，其他人唔得o架，今次我係純粹同華仔傾公事，因為之前同佢錄咗首歌，要搞mixing嘅嘢，唔同佢當面講唔得。」阿倫話關於隻歌，唔會今日講，以免俾人話宣傳。講到華仔嘅狀況，阿倫就話：「佢(華仔)嗌我通知所有親朋戚友，唔使去醫院去探佢啦，等佢好好休息，因為所有講嘢、笑同反應，都會觸動到痛楚。華仔知大家嘅心意，佢會心領」阿倫話最初都打算同華仔講吓笑傾吓偈，但最後都唔敢，只係講完公事就走，因為華仔話真係好痛。至於傷勢，阿倫強調華仔仍必須要臥床，但精神就好好，問到華仔係咪瞓唔到覺、係咪想返屋企過年、同太太朱麗倩有冇喺醫院照顧，阿倫就話華仔聽日會親身同大家講。
| (攝影：陳慧安) | | |
| |
來源 source: http://s.nextmedia.com
|
鍾意就快D Share啦！
|
|
|
