小豬好嘢！(Getty Images)
即上英超刨績王：http://win.on.cc/epl
尋日有韋大帝，今日就輪到小豬翻生！英足盃第四圈賽事，曼聯主場對韋根，領隊莫連奴意外畀舒韋恩史迪加踢正選，呢名一度連跟一隊操練資格都冇嘅德國球星，全場表現一流，先助攻為球隊打開紀錄，完場前更倒掛入波，帶領紅魔鬼大勝4:0過關，寸王賽後話，依家曼聯少咗人用，未來小豬大把機會表現自己，各位豬迷肯定開心死！
今次係舒韋恩史迪加385日以來，首次再為曼聯正選上陣，唔少人都睇實呢位世界盃冠軍成員嘅表現。小豬身經百戰，雖然被雪藏超過1年，但有質素就係有質素，完半場前佢於右路大腳斬入禁區，個波啱啱好落喺費蘭尼個頭度，後者一頂入網，為主隊打破僵局。
換邊後基斯史摩寧同米希達利恩各入1球，到83分鐘就係小豬表演時間，佢接應隊友禁區內二傳，背住龍門臥地凌空掛咗個波入網，睇到寸王都點晒頭表示讚賞。賽後寸王話小豬有表現，就係佢畀舒韋恩史迪加重返正選嘅原因：「當小豬返到一軍之後，佢好努力展現自己嘅能力。依家曼聯好多比賽，而迪比同舒尼達連離隊之後，球隊少咗人用，我搵唔到唔畀小豬落場嘅理由。」
舒韋恩史迪加15年加盟曼聯之後，表現一向唔算標青，到佢受傷患困擾、莫連奴上任紅魔領隊之後，佢更被雪藏，甚至被貶到去青年軍跟操。今仗之前，小豬只曾攞到1個入球同1個助攻，今次佢一場就兩樣攞晒，真係叻仔。
來源 source: http://hk.on.cc
|
鍾意就快D Share啦！
|
|
|
