掃呢頁CODE去手機

2017年2月23日 星期四

出租麵包車生意大減 老闆:做落去只因愛「老婆」 [壹週刊 - 1407 - 財經] __,M1,

做過車場維修的Siky不論是在布置車廂以至更換零件也一腳踢,務求要令愛車「靚靚仔仔」見人。壹盤生意出租麵包車生意大減 老闆:做落去只因愛「老婆」「佢係我老婆嚟㗎!跟咗我十年。」溫少基(Siky),一名惹火八十後,說話時七情上面,談及參選美食車的過程時更動以真火地訴說種種不公。唯獨說起心愛的麵包車,臉上才流露起絲絲溫柔;○七年開始踏足麵包車行業,前年全身投入麵包車「懷抱」,創立「BUNFUNVAN」 ...


做過車場維修的 Siky不論是在布置車廂以至更換零件也一腳踢,務求要令愛車「靚靚仔仔」見人。

壹盤生意

出租麵包車生意大減 老闆:做落去只因愛「老婆」

「佢係我老婆嚟㗎!跟咗我十年。」溫少基( Siky),一名惹火八十後,說話時七情上面,談及參選美食車的過程時更動以真火地訴說種種不公。唯獨說起心愛的麵包車,臉上才流露起絲絲溫柔;○七年開始踏足麵包車行業,前年全身投入麵包車「懷抱」,創立「 BUN FUN VAN」公司,為名貓「尖東忌廉哥」打造過專屬車廂,賺盡目光及人氣。但此盤生意卻是旺丁不旺財,生意額飄忽不定,可由旺季十萬元大跌至近月得數千元。「如果唔係本身鍾意車的話,我都唔會發展到現時咁複雜。」令他願在此行不停掙扎求存的原因,則要由其父親說起。

正宗車迷 周旋車界過十年

「細個時爸爸有部麵包車,載住一家四口連兩部單車同我哋兩兄妹周圍去,留下好多美好回憶。」背靠住「老婆」的他笑說。十八歲考車牌、坐擁的士、小巴、貨車、巴士及私家車五種牌照的他從專業教育學院的產品工程設計及科技管理學畢業後馬上展開了「車途」。由揸的士至管理的士群,再到維修車輛,他最後選擇落腳在出租麵包車一行。「爸爸以前喺大公司車行做咗廿一年維修,前幾年佢走咗(去世),令我更加唔想放棄麵包車呢行。」其目前手上持有十二部車,全由二手市場購入,主要分為貨車及小巴型兩大類,當中牌子包括有 Volkswagen及 Suzuki,每部也有動人故事。「呢部『河粉車』以前係由一名伯伯擁有,過去幾十年佢都係用部車風雨不改地送河粉,直到佢老到做唔到,記性又轉差時先賣咗俾我哋。」公司業務包括活動、婚禮、商業宣傳及美食車四大類,收費由婚禮服務車的數千元,至商業宣傳車的兩、三萬起也有,曾經為商場設計比卡超專屬車廂的 Siky指麵包車的可愛造型雖得到不少人注目,但實情是留得住印象也難做到每個月有穩定收入。

Siky笑稱第一架(右)是其「老婆」,指當年在街上看見愛車時留下字條給車主希望他能轉讓,數月後得到車主割愛售予他,轉眼已十年。

收入落差大 淡季僅得數千元生意

Siky生意額可由旺季十萬跌至只有數千,每月拉上補下才能應付後勤車場租金、牌費及保險等沉重開支。

商業宣傳車收費雖可達兩至三萬元,但卻不算「有肉食」。「接呢類單準備功夫好多,事前要成部車重新包裝過,包括梳化換皮同外觀噴油全部一腳踢。另外會提供其他設備,例如發電機或棉花糖機都有。試過有間洗手液公司,要求喺車上安裝來去水設備,要有個鋅盆教小朋友洗手,複雜性相當高,對車無一定研究唔會識。」正因對車抱有熱誠, Siky往往能在有限時間內順利起貨而得客人信任。看似風光,但養車的皮費卻重得可怕。「除咗牌費、保險、日常保養維修、燃油費同司機開支外,最重要係要有停車場同後勤工場作支援,每個月坐底要三萬元。」他指香港地少難有大地方發展車的行業,原先位於西貢的車場最近更受收地起樓影響,被迫搬進流浮山。他指宣傳及活動車生意會受天氣熱影響,也留意到近年各公司對麵包車的反應開始有回落跡象,經濟轉差時更不願豪花數萬做短期宣傳。回望旺季能月賺八、九萬元, Siky坦承要積穀防飢應付淡季。「靜起上嚟得幾千蚊生意真係要食樹皮,拉勻一年淡旺季可能每月只係夠出份糧。」

落選美食車 怒指計劃本末倒置

Siky早於 2013年已自製過美食車,更設計 Chubby卡通作主題參選美食車計劃,可惜最後落選。

當初令 Siky全身投入麵包車行業,正因他看好美食車前景;曾參與立法會小販政策小組委員會討論的他就計劃多次於立法會發表意見,並早於一三年把二手車改為美食車,早着先機的他最後卻於計劃中落選。「政府係認為我嘅計劃書唔夠人好先唔批,但我認為如果唔以我嘅方式喺香港做,根本做唔成。」語出驚人,非出自太有自信,而是現時計劃有太多盲點,首項則源於車身太高太大。「外國個個都用低地台嘅小型車去做,依家香港經營嘅都係大車,設備多咗重咗,地台又高仲要加梯級作連接,傳送熱食、湯水時有一定危險。」由從商角度去看同樣出事。「咁大部車投資額要成七十萬以上,如果只做兩年及只限在八個地方固定做已有壓力,又限死賣咩食物飲品,無得因應時節天氣變通,咁生意邊會易做。」

靠做善事保曝光率 幫政黨做宣傳受滋擾

一腔熱血雖得不到發揮,其美食車不能在公眾地方擺賣,但他指派對及私人活動對此仍有需求。不願離場,那就要出計搵生意,例如在婚展擺車宣傳,令更多人知道有相關服務。「花車服務會包埋布置同小巴接送,呢類收費最平三千蚊有找。」在室內放車也遠不及揸出街上吸睛,因此 Siky跟尖東名氣貓忌廉哥主人高老闆一直有合作,不少更是慈善性質。「之前高老闆鋪頭最後一日營運時佢有出忌廉哥專車俾市民影相,都有接送忌廉哥出入。之後都有定時出車送貓糧俾義工,去關注流浪貓。」高老闆指跟「 BUN FUN VAN」合作能達致雙贏,做善事之餘該專車上年也得寵物展賞識,得以駐場成打卡熱點。但卻意想不到,普通做麵包車宣傳一行,也受到不知名勢力滋擾。「忌廉哥專車試過被畫花車頭同車側,有次幫某『偏黃』政黨嘅議員做宣傳車時都有遇過同樣情況,後來有人傳話叫我小心啲,唔好再幫某類人做事。」果然,你想遠離政治也不代表政治不會找你,而 Siky除了會對惡勢力企硬,也希望在此行企穩。「幾個月後會再檢討一次,睇吓有無需要減持車嘅數量,但前景我認為仲有嘅,只差在做到幾多。」他踏着「老婆」的油門,意無反顧地說。

尖東忌廉哥(右)以往於信和便利店報攤「看檔」,因可愛外表而大受街坊及媒體歡迎。

2016年 4月,高老闆的報紙檔宣布結業,而 Siky則設計出忌廉哥專車,在告別當天接送牠出入之餘更成為一眾粉絲的打卡熱點。

Bun Fun Van另有小型貨車可當作宣傳車用,更曾一度因幫立法會某議員宣傳受到滋擾,車身慘遭刮花。

開業資料:

15年 6月

車輛、維修及內外翻新 $800,000

後勤工場租金上期 $12,000

公司網頁 $20,000

購置各種活動設備及維修保養工具 $60,000

總投資 $892,000

營業資料:

17年 2月(行業傳統淡季)

營業額 $8,000

後勤工場租金 $12,000

車輛牌費及保險 $8,000

員工薪金# $20,000

維修保養 $2,000

燃油及活動雜支 $2,000

宣傳 $2,000

總虧損 $38,000

#包一名全職及一名兼職

撰文:黃綺敏

攝影:關永浩&梁正平

攝錄:梁正平

ed_bn@nextdigital.com.hk


鍾意就快D Share啦!