鄭中基氹番老婆 變接吻魚
歌手鄭中基（Ronald）一連四場「PLAY IT AGAIN世界巡迴演唱會」前晚大年初三最後一場，Ronald第三場出動舊愛楊千嬅做嘉賓，更來個世紀擁抱「爆閃」，尾場輪到「正印」老婆余思敏（Sammie）踩台，兩人變「接吻魚」晒恩愛，又有男神黃子華走音娛賓，笑「暴龍哥」Ronald食完「牛歡喜」竟然唱到情歌！
Ronald的四場紅館個唱一票難求，前晚尾場吸引了譚詠麟（阿倫）、陳浩民夫婦、胡楓與孫仔、契女方國珊、李璨琛等來捧場。演唱期間，阿倫走到台前給Ronald送上利是，Ronald亦識做地「瞓身」接利是。過去三晚，Ronald的一對仔女在台下捧場，這晚就「三代同堂」趁Ronald和父親鄭東漢在台上表演時，一對姊弟就走到台上，Ronald見狀開心說：「呢個係我個女Emma，呢個係我個仔Evan。」囡囡Emma唱賀年歌時，旁邊的爺爺捉住孫仔手拍掌，Ronald更咀了囝囝一啖，Emma見狀即冧滋滋給爸爸送上抱抱，相當Sweet。
黃子華走音娛賓
之前一晚與舊愛千嬅世紀合唱擁抱成為熱話後，尾場就輪到太太余思敏（Sammie）上場！當Ronald唱完《三生有幸》後，太太Sammie突然在升降台出現，Ronald即望住控制台說：「導演你咁唔啱㗎！」Sammie專誠為老公打氣：「多謝大家嚟支持佢，作為你另一半，唱歌係佢最叻最鍾意，正正係咁，佢面對自己壓力更大，需要更大勇氣去面對舞台，我做到嘅嘢好少，能做嘅係佢最大後盾，等佢無後顧之憂，去做佢想做嘅事。」又謂：「佢呢段日子面對嘅壓力、犧牲、付出，我同佢講唔好介意結果，要享受過程，就算冇觀眾，我都會坐喺下面支持你，多謝你，老公！」太太一番話搞到Ronald眼濕濕，兩人相擁錫錫晒甜蜜。
個唱除了洋溢溫情，Ronald還請來男神黃子華做壓軸嘉賓，子華發揮Talk show本色笑指Ronald是奇人，唱情歌都可以亂食嘢：「乜都放落口不顧形象，唔通張學友食住臘腸唱《每天愛你多一些》，有冇見過張國榮食牛雜唱《風繼續吹》。一個食過牛歡喜嘅人點可以唱情歌？但鄭中基就得，一話開紅館就爆晒，仲要做嘉賓都攞唔到飛，所以我明白點解鄭東漢要上台彈結他，佢老婆仔女要上台，要表演先得，因為冇飛！」
兩人最大膽是笑台下阿倫是「掃」食者：「佢素來冇嘢唔食，乜都掃晒落口。」最後兩人合唱《風的季節》，演唱前子華已聲稱會走音，到最後果真唱到五音不全，爆笑全場！
見Sa爸多過阿Sa
慶功宴上Ronald接受訪問，說到四場請了不少嘉賓，連舊愛千嬅都走唔甩，「人情債」點還？Ronald說：「預咗啦，下次人哋有乜要幫手都隨傳隨到。（點解搵千嬅又冇搵阿Sa蔡卓妍？）千嬅係因為翻唱咗《閉目入神》。（阿Sa好少聯絡？）係好少，反而Sa爸見得多，之前喺電影公司春茗先見過。（請舊愛問准老婆？）都有問好唔好嘅，咁大家都咁大個人冇乜所謂。」
提到有報道指有歌迷在網上買「黃牛飛」受騙，Ronald無奈說：「我情願啲位吉咗，都唔想人買黃牛入場。我知紅館出面有人高價收飛轉手圖利，覺得紅館應該要處理吓，唔好畀人咁做。」至於阿Sa沒現身前夫個唱，逃離香港與一班好友度假，昨日阿Sa上載穿Tube top性感相上網。
文：音樂組
攝：鄭家俊
|
鍾意就快D Share啦！
|
|
|
