劉德華上月發生墮馬意外，連日喺醫院療養。曾經講過想返屋企過農曆新年嘅佢，雖然終未能如願，不過新年期間，連日嚟都有唔少圈中好友，到醫院探望華仔，令華仔喺病房入面，都感受到新年熱鬧氣氛。繼鄭中基夫婦後，今日下晝約5點，黃日華同老婆梁潔華、余錦遠陳家碧夫婦現身養和醫院。兩pair人喺醫院逗留1個鐘後離開。黃日華離開醫院時笑容滿面，一開口就話：「劉師傅(劉德華教黃日華打保齡球，黃尊稱對方為師傅)話叫我同大家講，辛苦晒，早啲返屋企休息。」講到華仔病況，黃日華就話見到華仔第一眼覺得佢肥咗，又指佢休息夠，又食多咗嘢，所以精神好好。問到華仔可以落床未，黃日華話：「可以坐到起身，但未落得床，呢排都唔使食止痛藥，醫生都話佢康復進度快過預期！」問黃日華知唔知華仔幾時可以出院，佢答：「冇大致講，大家都係傾吓偈，不過我都同佢講，叫佢唔好心急，最緊要聽醫生話！」記者問華仔有冇扭計覺得悶，黃日華就笑笑口講：「正常人都覺得悶啦，何況佢(華仔)本身個人咁活躍，成日周圍走。」黃日華亦有透露喺病房見到華仔囡囡向蕙。佢話：「呢排小朋友唔使返學，新年應該要一家團聚，華仔囡囡好醒目，佢見我喺走廊除口罩，就話病房唔可以除，好醒目，係個聰明伶俐嘅小朋友。」
來源 source: http://s.nextmedia.com
|
鍾意就快D Share啦！
|
|
|