藝人吳綺莉在葵涌開記招交代與囡囡吳卓林近日的事件。吳綺莉就坦言因壓力而召開今次記招：「冇嘢比個女更加緊要，唔好再傳更多奇怪新聞，真係要處理個女，如果自己都冧嘅話就冇人幫到佢，唔好再有其他傳聞，我自己係想個女平安。」更坦言自己非精神有問題：「我唔係精神有問題，每人都有壓力。我個女係出咗啲問題，我做媽媽要諗辦法處理。可能係我激動咗，但個女唔係好似我哋細個咁，會諗自己呢個年紀做乜畀你管，我自己都獨立到。」
對阿女影響力低
吳綺莉更自認自己現時對囡囡影響力甚微：「呢一刻我喺我個女眼中影響力好低，諗唔到可以點處理。呢個情況下唔好再講我有病，我冇病，我都要開工做嘢，我都需要時間搞我個女，我搵錢都係為咗個女，我唔想再咁落去。」問到囡囡現時是跟好朋友還是壞朋友，她謂：「呢一刻佢喺我朋友保護之下，但佢就嚟18歲，如果依家唔處理，我之後就處理唔到，我唔係有咩病，呢一刻係情緒唔係特別開心。」
問到卓林今日於facebook中留言會離開香港，吳綺莉說：「應該係！（有沒有聯絡卓林？）我朋友有聯絡佢。（係咪打畀佢唔聽？）唔係，小朋友已經18歲，同以前唔同，唔係可以好了解，希望大家幫下我，望大家明白我壓力大，小朋友係我個女，唔好再等我，畀啲空間我處理屋企問題，我唔想好似大龍鳳咁，大家由細睇到我大，今次件事對我嚟講係好大挑戰，我相信所有問題可以解決到，我冇乜屋企人，剩係得個女......」
叫卓林返屋企
傳媒又問到吳綺莉有甚麼跟女兒吳卓林說時，她爆喊謂:「我只係想佢返屋企咋！同所有阿媽都一樣，有乜嘢都可以喺屋企.......係囉！」再問到現時有否飲酒，她解釋謂：「如果我屋企好多酒，唔使去買便利店買一支酒囉！有朋友嚟我去買一支白酒，屋企有好多酒，絕對唔使買一支。」
自認傳統
問卓林的生父是否對她人生影響好大，她即謂：「唔係淨係一個人嘅，家庭成長背景、父母都可以影響到你，但由頭到尾除咗我個女之外，冇乜人可以影響到我。（有冇怪過卓林生父？）唔想去批評任何人，冇話啱與唔啱，一隻杯敲唔響，每個人都有做錯過嘢，唔好講番轉頭，過咗去就過咗。」問最近有指其母親曾掟錢落地讓她執，她諗了一會後便避重就輕說：「我冇喺內地節目講過，我係傳統中國人，雖然冇爸爸，但媽媽點都好，佢都過咗身，件事都過去，唔想再提以前啲嘢。（父母對你唔夠愛？）有頭髮冇人想做癩痢，個個希望有好爸媽，就算冇，有是但一個都好，但呢樣野唔係你去揀，你都要去接受。」記者會後，吳綺莉與好友一同離開，一起到好友的寓所。
|
鍾意就快D Share啦！
|
|
|
