62歲成龍去年獲奧斯卡頒發終身成就獎，成為首位獲此殊榮的華人演員！今日由好友英皇老闆楊受成於灣仔設宴慶祝成龍獲獎。
推無可推
約六時許，成龍步出酒店門外見記者，身穿白色唐裝衫的他笑容滿面。問到今次慶祝晚宴是否楊受成幫他搞？成龍表示：「係，由提名至攞獎，都收到好多朋友恭喜嘅說話，但我唔想炫耀，想低調啲，楊生一直提議（指搞慶祝晚宴），我一直推，推到今次真係無得推，曾志偉、爾冬陞、楊生（楊受成）做發起人，會叫齊我幾十年喺圈裏面認識嘅圈內朋友嚟出席，有啲幾十年都好少見，有時唔知今年見到，第二年仲見唔見到，所以，都係借奧斯卡之名，見老朋友為實！（晚宴大約有幾多人？）唔知，不過呢個晚宴我就一早已經知佢哋搞緊！（太太林鳳嬌、兒子房祖名嚟唔嚟？）佢哋之前日日睇奧斯卡都睇到悶啦，個獎都喺北京Office，冇拎過嚟，之後個獎都會放喺上海成龍藝術館。（謝霆鋒、劉嘉玲都嚟喎！）知道晒啦，前幾日我見到陳德森，問佢嚟唔嚟，佢仲扮唔知，我話我一早知道晒！（有冇特別環節？）冇，我只係出席，多謝楊生，佢係我四十幾年朋友，我攞獎佢仲開心過我，我一直叫唔好搞。」
老婆仔仔冇表示
談到成為首位華人奪奧斯卡終身成就獎，林鳳嬌同房祖名有沒有特別表示？成龍則謂：「冇呀，你知佢哋不嬲都好COOL㗎啦，我攞獎嗰日，祖名都冇恭喜我，但我冇嬲，頒完獎都有同史泰龍去慶祝。」早前於一個慈善晚宴上，有女士用30萬美金投得成龍與史泰龍新戲的角色，成龍承認此事，並謂：「係有一位女士投得，依家會安排一個鏡頭司機又好，乜都好，會畀佢出鏡，之後亦會安排佢同史泰龍出席北京同美國嘅首映。」日前吳綺莉與卓林有拗撬，卓林報警吳綺莉被捕一事，當記者問此問題時，成龍即說：「乜嘢事，做乜事？！多謝大家。」之後便返回酒店。
|
鍾意就快D Share啦！
|
|
|
