Jeana有男友接機。
女星何佩瑜（Jeana）在台灣高雄拍攝時遇上交通意外，於下午返抵港，導演男友翁子光早於一小時前到機場接機，在原定抵港時間一小時後，戴上CAP帽口罩低的素顏Jeana低調步出入境大堂，見到她的鼻樑明顯有紅腫。
驚後腦有事
Jeana一見男友即時笑晒，翁子光即時上前幫女友推行李，問到有否替女友擔心？翁子光說：「佢受傷有打畀我，梗係擔心啦，當時做緊嘢，以為佢有咩事。（見到相先知驚？）冇即時見到相，知道佢皮外傷，有頭暈，驚係後腦有事，好彩照X光冇大礙。（即刻飛過去陪女友？）我去都冇用，醫生先醫到佢。（咁你心靈上幫到佢。）有劇組照顧佢，好彩套戲已經拍完。今次撞車冇佢上次潛水咁擔心，佢潛水嗰次又喊又咩，其實真係好危險，水又凍，每次落水前都要用凍水淋上身，適應水溫。當時都有去睇佢，雖然自己唔得閒，要準備新戲。（之後會陪女友？）之後都會陪佢，跟住工作唔會遠，都係中港兩邊走。（娶咗佢咪唔使擔心？）兩件事都冇關係。」
誠心還神
Jeana又指今次意外屬不幸中的大幸：「已經好幸運，如果架車轉另一個方向就跌咗落山，返到嚟之後要誠心還神，好好抖吓，係鼻同眼有啲腫，之後係4月9先出活動，相信一星期可以消腫。當時意外都冇喊，因為當時瞓緊覺，當下唔係好理解到發生緊咩事。」
來源 source: http://hk.on.cc
|
鍾意就快D Share啦！
|
|
|