拍拖4年守處子之身
邦民女陳嘉寶 嫁初戀半億闊少
現年27歲的「邦民女」陳嘉寶（Anjaylia）昨日宣告封盤，將於11月25日嫁半億闊少黃頌祈，男友是她的初戀情人，兩人都是虔誠基督徒，拍拖四年的Anjaylia堅守處子之身，在媽咪同意下會在男友屋企借宿，但她強調絕不會雙喜臨門：「想維持番結婚嗰種開心。」
「邦民女」陳嘉寶昨在社交網宣佈與拍拖四年的半億闊少黃頌祈結婚。
因拍日本邦民財務廣告而被封「邦民女」的陳嘉寶，入行後鮮有緋聞，身為虔誠基督徒的她，在教會認識坐擁半億身家的初戀男友黃頌祈（Epaphras），兩人拍拖僅一年時，已被影到進駐男友近千萬的炮台山豪宅，不過，Anjaylia堅守婚前沒有性行為的教條，拍拖四年都是有愛冇性，今年兩人屢傳婚訊，2月就被本報影到拍拖睇家居用品似佈置新婚愛巢，之後更見男方家長飯敍兼睇裙褂，曾表示結婚會公開的她，昨早在社交網兌現承諾。
【見家長】
Anjaylia今年2月被本報影到見男友家長兼睇裙褂。資料圖片
【撐枱腳】
男友家族雖坐擁半億身家，但兩人拍拖都會食平民車仔麵。資料圖片
Anjaylia將升呢做人妻，好姊妹昨紛紛送祝福。
「愕然多過感動」
Anjaylia撰文感謝神以愛將他們連結在一起：「Epaphras是我人生中的第一段愛情，我們在教會相遇、相識、相知、相愛，迄今已經超過了四個年頭。今天，很高興的跟大家宣佈我們已經準備好要步入人生中的另一個階段了。」
準人妻Anjaylia昨晚現身中環出席品牌活動，谷胸晒事業線笑容冧甜，她說：「11月25日喺香港行教堂，亦會喺香港擺酒。」問到男友幾時求婚？她說：「呢樣要留少少秘密，因為男友好怕醜，叫我唔好講，都要尊重佢。」問是否好感動？她坦言：「愕然多過感動，因為同男友講過，如果求婚要瞞住我嘅父母先得，但當日求婚雙方父母喺現場，當時驚到唔識喊，覺得點解父母好似出賣我，過兩日消化咗消息先識開心。」
問到求婚戒指呢？Anjaylia即展示手上一隻戒指：「呢隻係同耶穌結婚嘅戒指，真正嘅求婚戒指喺屋企，因為自己好論盡同大意，驚唔見所以冇戴出嚟。」現在是否試婚同居？她說：「唔算同居，我稱之為借宿，因為我住得比較遠，有時開工三日只瞓得七個鐘，所以喺媽咪同意之下，有時會去男友度住方便返工，因為媽咪都認定佢係一家人，互相信任。」
準人妻Anjaylia昨晚谷胸出席活動，冧笑宣佈與男友於11月25日在港結婚。
陳凱琳陳瀅陪嫁
問到會否雙喜臨門？Anjaylia堅決說：「唔會，冇呢個可能性。」是否堅守宗教規條？她坦言：「做開會一直堅持，想維持番結婚嗰種開心，一個喜已經好開心。」Anjaylia多謝好友陳凱琳和陳瀅幫忙保守秘密，問兩人會否做姊妹？她說：「其實都計劃中，好多未整，婚紗相未影，自己仲拍緊劇《誇世代》，8月先完成。」
陳凱琳昨以英文短訊回覆傳媒祝賀閨蜜：「我替她感到很高興！」問到會否做姊妹？她表示：「計劃中。」追問何時跟男友鄭嘉穎宣佈喜訊？她說：「哈哈，還未。」至於跟鄭俊弘拍拖的何雁詩亦戥好友開心：「之前見過佢未婚夫，都覺佢係一個好好男仔，希望佢哋快啲三年抱兩」陳瀅則說：「好戥佢開心，希望佢白頭到老，因為每次見佢哋都係咁恩愛，永遠keep住咁甜蜜。」
採訪：卓寶花、嵐山
攝影：陳慧安
難得生性暴龍哥創科眾籌夢，遭隱世肥報販秒殺！ https://goo.gl/hnEB7D
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw
|
鍾意就快D Share啦！
|
|
|