開鋪做泰菜，當日發現魏駿傑連廚房後鑊都要做，對住熱辣辣爐火，煮到身水身汗。
娛頭
女細老婆嫩 供 500萬教育基金 半百魏駿傑開泰菜館揸後鑊
49歲的魏駿傑，家有 29歲重慶少妻張利華和 6歲囡囡，要積穀防饑，搏命做勤力如牛。不但頻頻北上登台搵銀，又在內地搞木材生意，最近更發現他靜靜雞開泰菜館謀多條後路，後鑊都要做，身水身汗。
有云：「養一個小朋友要四百萬」，女細老婆嫩的魏駿傑，單是阿女教育開支已預算花五百萬，加埋身為二千五百萬樓奴，半百魏駿傑的高潮，如「港爸」寫照，為頭家中港兩邊開行 turbo，冇得唞。
親自送外賣
近日有網民爆魏駿傑在開設的餐廳親自招呼客人，上週本刊發現他在西貢海灣酒店附近開六千呎的泰菜館「泰道」，據知魏駿傑今次豪掟七位數，新開張期間，差不多天天親自落場打點。為冧客，做活動布景板任影唔嬲，見 order多，後鑊都做埋，在廚房切菜炒餸有板有眼，樓面、廚房兩頭騰，做到身水身汗。
本刊記者上前訪問，對於一腳踢，他說：「依家世界難撈，乜都做管埋廚房就要落手落腳做。我一向喜歡煮嘢食，係隱世廚神，我煮的話比好多廚師仲好食。」
由於食肆對正沙灘，他打算遲些做埋沙灘客，唔介意為吸客做埋外賣仔，賺到盡。「我會自己送外賣去沙灘，為生意豁出去」
魏：個女讀書、雜費貴
做北漂搵到錢，但半百魏駿傑仲好搏，皆因他孭住一個一千七百萬物業，加上要為囡囡供五百萬的教育基金，擔子重。為開源又不想與妻女經常分隔兩地，魏駿傑寧願在港做多瓣。
「錢幾時都要賺，香港乜嘢都貴，個女讀書、雜費都貴。」據悉魏駿傑安排寶貝女入讀九龍塘名校。
女細老婆嫩，雖然為她們未雨綢繆，魏駿傑卻反對成功需父幹。「肯定反對，我自細到大字典只有成功靠苦幹，個女唔知我幫佢供五百萬基金，唔好等佢認為老豆大把，咁會 hea住做。」
再搵一筆買地起樓
開業不久，餐廳生意不錯，他估計好快回本，密密搵錢，原來他打算再賺多桶金之後，計劃和發展商合作，買新界地起樓。
魏駿傑積極搵銀，老婆張利華也在網上賣衫賺錢買花戴。之前婚姻亮紅燈，經歷風浪，現在感情更勝從前。
老婆變咗
「老婆有嚟餐廳幫手，大家都成長咗，華華變好咗好多，佢嘅改變好大。不論對我嘅語氣，同對呢頭家嘅投入感。」成功挽救婚姻，九年夫妻情，魏駿傑覺得最重要男人識退讓。
「改變唔到佢，不如我改變自己。我作為一個男人好多缺點，有邊個唔嗌交，嗌完交之後，最緊要冷靜，唔好衝動。對同錯都好，男人有天職去讓女人，老婆永遠是對的。有時鬧交講句：『女俠饒命呀！』講吓笑咪輕輕帶過。」
恨返 TVB？
其實他是愛妻號，兩個物業都加老婆名，而且過時過節例必慶祝。「有風波咪打吓抗生素，做多啲嘢囉，不過年年紀念日我都煎心形安格斯，送九十九枝玫瑰，呢啲嘢我唔會唔記得。」
登台，賣木材，做食肆身兼三瓣，問他想不想重返 TVB拍劇搵多筆，他笑住𦧲飯應：「幫我搭吓路，邀請珍姐、珊姐嚟食餐飯，戲癮好痕。建議搵我最愛嘅監製王心慰拍《闔府統請》下集，搵番舊拍檔王喜、張兆輝。」
全海景六千呎 三十萬租
魏駿傑呢鋪投資七位數嘅瞓身作「泰道」，位於西貢海灣酒店鄰近，餐廳戶外內座位都對住無敵海景，六千呎鋪要月租三十萬。二樓 VIP房有得唱 K。
有樓有高潮 1700萬樓奴
娶嫩妻的魏駿傑，與老婆一直租住西貢早禾坑村屋，直至 13年買入第一嚿磚頭， 800多萬的九龍城匯賢閣，有樓揸手亦預埋老婆份，聯名持有，至去年底賣出，只賺 50萬。 15年婚姻亮紅燈，挽救家庭的他再同老婆聯名購入 1700多萬的西貢北港獨立屋作愛巢，成功箍煲。
估佢唔到
當年魏駿傑與滕麗名拍《陀槍師姐》撻着，拍拖長達九年，到 07分手收場。男方因此被指花心，未幾被踢爆有新歡張利華（現為妻子）。
世事無絕對，被指花弗的魏駿傑比滕麗名更快安定。 10年娶嫩妻，從此修心養性，愛家的他不時被影到湊女買餸，反而滕麗名情路迂迴，曾搭上有婦之夫郭政鴻，之後與金融才俊朱建崑拍拖，又鬧出有正印。最後滕麗名成為贏家， 13年當人妻。
撰文、攝影、攝錄：娛樂組
|
鍾意就快D Share啦！
|
|
|
