背負小三之名六年 忽現小四
黃宇詩戀失婚男：視佢終身伴侶
現年41歲的黃宇詩近年淡出幕前，轉戰賣內衣，2011年被指戀上人夫彭慶餘，當時她表示會與對方斷交，至大前年二人被影到拍拖，她才大方認戀失婚男，但強調感情發展在男方離婚後。昨日有周刊影到黃宇詩與男友拍拖，又以小三變正印形容她，黃宇詩接受本報訪問作出反駁，又表明已視男友為終身伴侶。
黃宇詩於2011年被爆戀上人夫Peter，其後女方斬纜，至大前年二人被影到拍拖睇戲。資料圖片
黃宇詩前日剛度過41歲生日，一向低調處理感情事的她，當年與鋼琴王子陳雋騫的短暫情緣，由開始到結束都甚少提及，直至2011年，她被本報影到與有兩女一子的測量公司董事兼人夫彭慶餘（Peter），拍拖買餸玩煮飯仔，即被懷疑當小三奪人夫，其後她公開表示會跟Peter斷交免誤會。
不過，黃宇詩與Peter大前年再被影到拍拖睇戲，她終不避嫌公開認戀失婚男，表示與Peter拍拖兩年，強調與男友開始發展時，對方已經是單身，她亦知道男友有三子女。昨日有周刊報道指黃宇詩與男友在赤柱十指緊扣拍拖，形容她由小三變正印，她接受本報訪問時作出終極反駁，表明與男友雖未有結婚計劃，但已視對方為終身伴侶。
2014年黃宇詩在Ig貼相，公開認戀Peter。資料圖片
Peter與前妻育有兩女一子，離婚時小女兒只有一歲多。資料圖片
「我哋光明正大」
對於再被形容為小三，黃宇詩昨日在位於上環PMQ元創方的內衣店接受本報訪問：「首先我唔係小三，冇需要負上莫須有罪名，我哋大概2010年認識，Peter喺2011年分居，同年年尾佢對我展開追求，後來被《蘋果》影到，我都有拒絕過，再慎重考慮過，約2012年先同佢正式開始。我冇問過佢幾時正式離婚，但知佢幾年前，法庭判咗佢哋正式離婚，咁多年嚟我都係光明正大，唔使避忌，我唔係小三，唔想負上莫須有罪名。」
黃宇詩又嘆謂：「佢幾年前離咗婚，我哋光明正大，唔應該攞嚟再講，今次澄清得咁徹底，大家會知道晒所有嘢。但最唔開心係連我過身嘅爹哋（黃霑），都要摷番出嚟講，佢過咗身影響唔到佢啦，但真係唔想再影響到我媽咪（華娃），唔好拖我父母落水，呢個係我自己嘅事，我係好愧疚。」
黃宇詩昨在內衣店接受本報訪問時，反駁周刊指與男友Peter拍拖時，對方已與前妻分開一年。攝影：沈健程
前妻：被迫離婚
談到Peter前妻陳小姐昨日回覆本報時，指當年是被迫離婚，以及贍養費及補償是「冇得到任何嘢。」黃宇詩說：「我冇問，但照我知唔係得唔到。」Peter可有照顧三名子女，每月有否給錢前妻？黃宇詩先點頭，然後說：「係，好肯定！」但對於陳小姐指是被迫離婚，黃宇詩則表示不知道。對於Peter用另一位陳女士登記車輛代步，疑似有小四，黃宇詩對男友充滿信心：「唔係，我係知咁多，嗰位女士我見過同識，咁講好黐線，總之係普通好朋友。」
採訪：黃曉妍、嵐山、陳杰
黃宇詩是黃霑與華娃所生的女兒，二人感情要好。
|
鍾意就快D Share啦！
|
|
|