被喻為「有一種女朋友叫唐詩詠」嘅唐詩詠，雖然佢同洪永城嘅關係撲朔迷離，最近仲有傳佢哋三年情告吹，主因係男方未有結婚打算，但係女嘅一直好想組織一個家庭！咁啱得咁橋，詩詠喺《不懂撒嬌的女人》，先係被賤han傷透心，不過喺佢失落嘅時候，遇上暖男Saving哥王浩信，本來佢哋兩個好有feel，但係因為Saving對婚姻有恐懼症，唔敢同詩詠發展，但係去到噚晚嗰集，終於有新進展！話說自從喺台南返嚟之後，王浩信一直避開詩詠，whatsapp已讀不回，連返屋企都要等詩詠出咗門口，佢先敢返去！點知喺陰差陽錯下，王浩信扮完金絲雀喺梳化典嚟典去，走咗入浴室好嘆咁喺度沖涼，詩詠突然間返屋企拎文件，仲撞正人有三急去廁所，喺隔住浴簾嘅情況吓，王浩信聽到詩詠話鍾意佢，又讚佢係慳唔係孤寒。辦緊大事嘅詩詠，終於發現王浩信原來喺度，即刻抽衭走人，王浩信見到詩詠未拉好拉鏈，睇到條白色底衭邊，唔理三七廿一求其拎住條毛巾遮住下半身，衝落街咁追詩詠！正所謂橋唔怕舊最緊要受，當日王浩信喺EU做渠頭嗰陣，為咗救爛賭阿媽雪梨，係半裸咁拖住跑，今次佢追詩詠坐小巴，跑跑吓又甩咗條浴巾。最後佢哋關係大躍進，最後王浩信實現咗詩詠嘅「西瓜論」，願意為詩詠做一個有承擔嘅人，跟住梗係嚟返場熱吻喇，佢哋連開會都好sweet咁喺枱底拖手！睇到詩詠見到王浩信為自己改變，即刻好感動咁喊晒，唔知喺現實生，呢個肯承擔嘅人出現咗未呢？又或者已經出現咗，只係睇吓佢幾時開竅？
| （電視圖片） | | |
| | | |
| | | |
| | | |
|
鍾意就快D Share啦！
|
|
|