「任白」兩大愛徒陳寶珠、梅雪詩（阿嗲）將於7月再響鑼鼓第三度合作演《蝶影紅梨記》，日前兩人接受電台訪問，談及當年師父任劍輝和白雪仙被公認是一對神仙美眷，寶珠姐跟阿嗲也直言羨慕。曾移居加拿大的寶珠姐更曾目擊任姐和仙姐去旅行時有多恩愛，寶珠姐說：「仙姐對任姐嘅照顧，真係無微不至，尤其係睇見佢哋到溫哥華去旅行，仙姐會親自幫任姐挽手袋，變咗好似工人咁，任姐咩都唔使拎，飯後仙姐又會遞上牙籤，任姐晚上一肚餓，仙姐又會親自下廚為任姐煮消夜。任姐亦好依賴仙姐，佢哋真係好sweet！」阿嗲表示：「我好羨慕佢哋有一個互相了解嘅伴侶，呢樣係好難得。」
任姐辭世對仙姐打擊大
談及1989年11月任姐突然因病辭世，寶珠姐表示當年她身在加拿大，而阿嗲則目擊仙姐幾乎崩潰，阿嗲說道：「呢件事對仙姐嘅打擊好大，佢成個人變得好頹喪、呆咗咁，又唔食飯、一句話都唔講，成日坐喺屋企唔講嘢。當時，感覺根本唔係我哋所認識嘅仙姐，我睇住咁樣嘅仙姐維持咗好多年，覺得好心痛。幸好，仙姐有好多好朋友一直陪伴佢，每晚都會等佢瞓咗先離開。」及至90年代尾復出，寶珠姐回流香港，才多了機會陪仙姐散心，亦經常到仙姐家中，與她打麻雀耍樂，她說：「我同倫永亮都陪過仙姐打麻雀，我哋志在消磨一下時間。」問到仙姐對任姐的離世到今天是否已經釋懷，阿嗲坦言：「我覺得仙姐仍然唔係真正嘅開心，不過多得仙姐身邊有好多年輕嘅朋友陪伴佢，佢哋都好尊重同愛錫仙姐，令佢心情變得開朗。」
唔介意「執阿刨二攤」
2014年，仙姐號令寶珠姐及阿嗲為任白慈善基金籌款演出《再世紅梅記》，促使寶珠姐及阿嗲首次合作演粵劇，但當年有指仙姐頭號愛徒龍劍笙（阿刨）以病為由臨時辭演，促使仙姐一怒之下「陣前易角」換上陳寶珠。寶珠姐坦言從不介意被指「執阿刨二攤」，她說：「我唔介意！係開心都嚟唔切！阿刨因身體唔舒服辭演，換上我嚟做，我好開心。我一直好希望可以喺任姐仙姐嘅任白基金之下，以徒弟嘅身份來參演，我已經期待咗好耐，仙姐問我做唔做，我話：『做！』有沒有信心：『有！』所以我一秒鐘都冇考慮就應承咗。」
壓力大到喊
不過，寶珠姐雖然師承任白，但十多歲時已轉往專注電影發展成為紅透半邊天的「影迷公主」。重新兼全身投入演粵劇，她坦言答應仙姐後，臨開鑼鼓前才知驚，她說：「答應仙姐時係勇字當頭，但愈近演出就會想『死喇！』係冇諗過會驚，當時每個人嘅焦點都係我，會考慮我：『掂唔掂㗎？』係自己畀自己好大嘅壓力，愈嚟愈驚，綵排又喊，返到屋企又喊。後嚟，得到好多朋友嘅支持同鼓勵，畀到我好大嘅正能量先有信心。」阿嗲亦大讚寶珠姐是個很勤力的演員，願意為演出而作多次的綵排。至於今年7月寶珠姐和阿嗲再度合演唐滌生另一名劇《蝶影紅梨記》，二人坦言面對仙姐嚴謹的要求，的確感到有壓力，但仍然很享受與仙姐排練的過程。
|
鍾意就快D Share啦！
|
|
|