去到五月大家都諗到母親節，又到咗向媽咪表達愛意嘅時候。雖然平時都可以向媽咪表達愛意，但係喺呢個節日送禮物就更加有意思。唔少人都會選擇買一啲現成嘅禮物，或者只係食餐飯，但就好少落手落腳整畀媽咪，不過其實送啲咩都好，都係對母親嘅一番心意。而憑住劇集《心理追兇Mind Hunter》弒母戲份而人氣急升嘅何遠東（阿東），就選擇咗親手包餃子比媽咪做母親節禮物。
包餃子頌親恩
問到點解會選擇包餃子畀媽咪，阿東就話：「其實包餃子呢，我哋原本全家人都唔識，純粹係因為我哋好想食，咁就各自去學，慢慢就變咗係我哋嘅一個話題，畀全家人一齊去做。我屋企一包餃子，每個人都會坐喺度一齊包，包餃子其實係我哋一家人一個好好溝通嘅時間。」細個嘅時候成日都會覺得父母唔喺身邊就最好，因為可以自由啲，想做乜就做乜，不過阿東就話：「我媽咪其實係事業型女性，媽咪以前成日唔喺香港㗎，佢成日都要喺內地工作，細個都唔係成日見到佢，會好掛住佢，有時候甚至會去佢工作嘅地方同佢開工，咁都幾得意嘅。」
第一次演出唔敢畀父母知
提到阿東同父母嘅關係，佢都坦白咁話：「我會話阿媽始終永遠係最錫你，無論你做錯咩呢，點曳都好，佢就算係打都係喊住口咁打㗎係嘅，我覺得關係好，阿媽一定係最好嗰個，咁阿爸呢，我以前覺得同阿爸係完全唔啱feel嘅，但係唔知點解呢，愈大就愈開始傾到偈，可能我真係老咗啦，哈哈！」講到父母對自己嘅支持，阿東就自爆第一個演出唔夠膽叫父母睇：「我基本上讀書嘅每一場戲呀，每一個演出呢，佢哋都有嚟支持嘅。除咗我入學嘅時候第一個演出，我真係唔夠膽叫我爸爸媽媽嚟睇，因為第一個演出，我只係着住條底褲咋！嗰時仲要企出嚟做戲，咁我就諗如果真係叫阿爸阿媽嚟，可能佢哋會叫我退學㗎！」
大個仔唔想兩老操心
阿東由細到大都係一個肥仔，早年亦都驗出有類似脂肪肝嘅問題，就算有病要入院做手術，阿東都唔敢同父母講，因為佢唔想父母擔心咁多：「我再早一、兩年試過條腸有事，我記得我阿爸阿媽嗰日係佢哋去旅行嘅第一日，我都真係唔夠膽講，我淨係臨入手術室之前同家姐講我依家去做手術喇！跟住我家姐就好大反應話『吓，你做咩做手術呀？』我剩係同家姐講條腸有啲事，我都唔想令到父母擔心自己咁多，因為佢哋已經擔心太多嘢。」
窩心提醒顯關懷
做藝人可以話係冇日冇夜，忙起上嚟大時大節都要開工，問到媽咪會唔會好介意，阿東都話：「我媽咪口嗰句就係理解嘅，咁但係心嗰句都係希望返嚟食到一餐飯咁可能係依家經歷多咗，其實會發現，食一餐飯啫，其實係一個好微不足道嘅要求，所以我依家都好爭取，點樣都好，都返去亮吓相，見吓面。」阿東都話想趁呢個機會同媽咪講番幾句：「我只係希望阿媽嘅身體繼續健康啦，繼續青春美麗咁雖然佢口嗰句就會話『你好煩呀！』仲成日提我哋飲湯呀，瞓教要冚被呀！但係其實呢啲提醒係好重要，我係口嗰句話你煩，其實係叫你唔使咁長氣。不過係開心嘅，因為你仲喺度同到我講，咁所以我都係好多謝你嘅！」
場地:頂好海鮮酒家
服裝:XSXXL、LNBR
|
鍾意就快D Share啦！
|
|
|
