絕迹樂壇超過二十年的前歌手黃翊，當年憑着斯文外表及一把成熟聲音，在80年代迅速走紅，惟當年他因為初戀被雪藏，沉寂了幾年，90年代初期後浪湧現，令他意興闌珊離開娛樂圈。低潮時期，2005年黃翊與姊姊一起開設大牌檔小菜，未料做得有聲有色。早前黃翊被邀上無綫客串唱歌，引來極大回響，讓人驚覺他是顆滄海遺珠，黃翊笑言：「好壞都是一種體驗，沒有昨天的我，又怎會有今天的黃翊！」
黃翊在大埔街市開設的大牌檔小菜，每晚客似雲來，轉眼間已經營了十二年，算是打響了名堂。這天在晚市開始前為黃翊做訪問，束着長辮的他，黑黑實實，跟初出道時的樣子有頗大分別。
戀愛大過天一雪玩完
他是參加1986年第五屆新秀出身，隨即簽約唱片公司，1988年機緣巧合下唱了一首奧運主題曲，被讚嗓音獨特雄厚，某日黃翊被召返公司，公司表示會全力捧他：「我喺娛樂圈日子唔算長，短短幾年但都出過七張唱片，當年真係少年得志，比較反叛，初戀識咗個女仔拍拖，好投入，公司唔想，但講真點可以做到？跟住我就被雪藏，嗰陣仲有年幾約，自己太有信心，諗住完咗約咪簽過第二間囉，點知後浪湧住嚟！有段時間我去咗內地登台搵錢，但因為冇上電視冇出唱片，觀眾好快遺忘，後來歌酬不斷縮，去到一個位我自己都接受唔到，嗰個位係尊嚴。」
決定離開娛樂圈後，太太陳存正鼓勵他賣設計T恤，他卻有點猶豫：「佢話我多鬼主意，不如試吓設計T恤擺跳蚤市場啦，太太係我嘅明燈，雖然有啲過唔到嗰關，但最後都有去試，估唔到有得做，不過就真係辛苦錢，日曬雨淋，我個人膚色點解咁黑？都係嗰陣曬出嚟嘅，之後同家姐搞飲食，兩邊做，後來舖頭生意愈來愈好，索性全職睇檔！」
做飲食行業同樣是辛苦錢，黃翊說他們只做晚市，但他每朝十一時便返大牌檔，點數和入貨：「好多嘢搞㗎，到下晝先有少少私人時間，就去接個仔放學，同佢玩一陣就返嚟開工，到放工都十二點，咁就一日喇！」
以為好friend遭人白眼
目前生活安穩充實，回想低潮時，黃翊曾遭白眼：「試過撞番一個同期歌手，我以為自己同佢好friend，就上前打招呼，想讚佢仲做得咁好，點知對方嘅表情係……（不屑？）總之係好難受，係邊個就唔講啦，我諗呢個人都唔記得咗呢件事，但係佢令我以後唔敢再主動同啲識嘅藝人打招呼囉！」
早前黃翊獲邀上無綫再開金口獻唱，獲得甚佳評價，他笑說：「廿幾年前我放好多心機去唱，但反應唔係我預期中，今次無心插柳，反而令人有驚喜，所以凡事都係平常心啦，做乜都唔好有太多期待；其實依家都有好多人搵我傾嘢，自己覺得舒服、開心就做可能依家香港好多人唔開心，我出番嚟唱歌，令人懷念番以前嘅開心時光，都係好事。」他亦想向兒子證明，爸爸以前是個歌手呢！
後記：怪客誤當王傑
這次黃翊「復出」唱歌，算是一吐揚眉，突然再被肯定「歌手」身份，令他哭笑不得。近年愛上電單車的他，試過戴着頭盔在街上駕駛，也被旁邊的司機認出來，他笑說：「有個古怪客人嚟大牌檔搵我，叫我請佢飲啤酒，唱歌畀佢聽，我婉拒咗幾次，最後一次佢同我講，唱兩句都好吖，就兩句『到底得幾分傷心幾分癡』，原來佢當咗我係王傑！」王傑又好，黃翊又好，那些年，香港人都很快樂，很讓人懷念，謝謝你們的歌聲！
|
鍾意就快D Share啦！
|
|
|