慧妍雅集今晚喺尖沙嘴洲際舉行5周年慈善晚會，97年港姐冠軍翁嘉穗都有出席。提到佢大仔Jason之前喺「香港健力錦標賽」中贏得青年組冠軍，兼打破三項香港健力舉重紀錄（新聞連結： http://bit.ly/2pkKTT8 ），翁嘉穗話：「係呀，佢一直都喺香港，喺香港比賽，遲啲就會出去比賽，係一個亞洲賽。」佢話自己好支持個仔：「總之唔影響學業就OK，開頭佢自己練咗半年，有日覺得要比賽，我就話唔可以唔搵教練，因為怕受傷。（囝囝係咪大隻過爸爸？）大隻好多。」問到Jason拍拖未？媽咪翁嘉穗話：「冇時間喇，日日都有運動要做。（有冇狂蜂浪蝶？）冇呀，冇聽佢講過，不過有啲同學仔都話佢好犀利。（係咪成為風頭躉？）OK嘅，因為比賽嘅都唔止佢一個，仲有幾個都好好成績。」翁嘉穗話因為囝囝太細，所以暫時都唔會畀個仔拍拖住：「o依家16歲，太細喇，o依家唔好住喇，起碼18、19歲讀大學先啦，make sense啲囉！」問到個仔參加舉重運動後係咪覺得man啲？翁嘉穗話：「佢鍾意做gym嘅，嗰個朋友就train咗3年，覺得人哋好勁呀！自己都想strong啲，所以之後搵教練。個教練問我想個仔咩程度，我就同佢講比賽完就OK，但係教練就話佢好有潛質，話佢o依家舉嘅重量已經係國家級，總之覺得個仔好犀利。」翁嘉穗補充話：「其實安全完成比賽就OK，最緊要努力。（有冇獎勵畀個仔？）食咗餐飯，暑假會一齊去個旅行。」
| （攝影：仇志德） | | |
| |
|
鍾意就快D Share啦！
|
|
|
