中國小姐冠軍趙哲妤（Uny）28歲時，未婚懷孕，去年聖誕誕下跟前男友所生的女兒趙真羽(Natalie)，轉眼，Natalie已經4個半月，仲有一個乳名叫「小魚」，Uny話：「Natalie係有聖誕女孩嘅意思，因為佢鄰近聖誕節出世，叫小魚，係因為我生佢前一日，做水中瑜伽。」Uny碩士畢業，選美出身，講說話細細聲，就好似鄰舍一個小家碧玉，或者係一種受保護動物，過往Uny同唔少富二代傳過不少緋聞，佢話：「以前話我同咩富二代嘅新聞，全部新聞都係無一齊過，咁多年都係同一個男仔一齊，我無刻意去解釋，我身邊男友明白就可以。」其實Uny講緊嗰個明白佢嘅男友，就係同Uny拍拖多年嘅唯一一個男友，即係小魚的生父。重提舊事，Uny已經處之泰然，跟當日含淚宣佈有喜，大不同，當初決定生小魚嘅時，Uny係咪想個男人回心轉意？佢話：「就算係回心轉意都盡量唔好，個問題會複雜化咗，大家感情係有一條刺，o依家仲係好深，點解要一個女仔，一個人去面對咁大問題，自己匿埋咗，風流快活，呢樣野又唔會有彎轉，簡簡單單呢個小朋友係我，我會負責。」講起小魚的生父，她的前男友，Uny話：「前世欠咗佢，佢對唔住唔係我，佢對唔住小朋友，對唔住自己，因為我同佢一齊佢好好，佢差我唔會同佢拍拖，總之佢對得住我哋段關係，散咗真係有咗，佢唔面對，話落咗佢，大家關係搞到咁，佢係對唔住小朋友，咁大個人，經濟條件有啲，每個人都有佢嘅果報，上天話我知呢個小朋友來到係我嘅責任。」估唔到一個柔弱女子，慘被飛後仲有BB，最後勇敢面對，獨力承擔，點解Uny會咁樣揀？佢話：「嗰時有衡量過，得兩個選擇，一係面對，一係逃避，逃避係唔要個BB，可能去第二度唔見屋企人、朋友，我都有諗過，咁大個人有膊頭，要正面面對，咩事都可以克服到。」承擔責任，係要付出好大勇氣，喺重大決定嘅過程入面，Uny喊過無數次，連佢自己都擔心自己會產前抑鬱，佢話：「因為大肚時會情緒波動，大肚嗰時會變咗第二個人，好容易唔開心，我以前係比較樂天，好少好傷心咁喊，都係撒嬌，要媽咪氹，每日起身朝早想喊，點算呀？有個生命喺呢度，生咗之後完全唔同咗，好多人都會，可能未結婚生仔前有孤獨感，空虛感，好需要另一半、朋友嘅陪伴，生咗之後，就算係無一個異性，或者朋友係身邊，你都唔會空虛，呢個小朋友做咗你一個生命嘅寄託，係一個上天恩賜。」做咗媽媽之後Uny，身心都有好大嘅變化，她說：「我覺得原來有小朋友之後，先係生命嘅開始，讀完書，人生嘅目標就係為咗，吃喝玩樂，開心，無咩特別，屋企OK，又無咩經濟壓力，書又讀哂，男朋友又有，無咩特別想做啲咩，o依家唔同，好似幫緊第二個人去計劃人生，全部野重新來過，我發覺人生無目標係唔開心，之前我欠缺人生目標，有咗小朋友係人生勝利組正式開始，感覺到喜悅係由心而發，學識無條件付出，以前覺得好愛呢個男人，但係o依家先真正知道咩係愛。」
| 採訪：楊潔雯 攝影：葉君海、林德雄 | | |
| | | |
|
鍾意就快D Share啦！
|
|
|
