林文龍喺2008年拍完《法證先鋒II》後，離開無綫向外發展，回復自由身嘅佢，其間試過北上拍劇，又簽過俾港視，可惜港視發牌夢碎，喺機緣巧合之下，林文龍嘗試投資拍電影，頭炮作《我們停戰吧》先後喺美國3個影展成影帝，直到舊年喺TVB高層杜之克嘅邀請下，回巢參與《不懂撒嬌的女人》嘅演出。《不懂撒嬌》被喻為非一般嘅TVB劇，不單迴響好大，而且仲掀起煲劇潮，日前林文龍喺尖沙嘴接受《蘋果》訪問時，直言對坊間反應感到意外：「呢個迴響係比想像勁，之前亦都冇諗過，作為演員，收到觀眾呢啲反應，當然覺得好鼓勵，今次返嚟拍劇同團隊傾過偈，佢哋話就算你幾有心機拍，身邊一定有人話o依家仲邊會煲劇，睇嗰啲仲被俾人當係怪物，但係今次啱啱相反，煲劇嗰啲先係同路人，呢啲真係令人好鼓舞，改變好大。我成日都同大家講，我哋唔可以自滿，要聽吓人哋嘅意見，好嘅聽完唔好沾沾自喜，反而要聽多啲唔好嘅批評，要改善自己，唔好活喺一個自我感覺良好嘅世界裏面。。」林文龍覺得無論係個人、團隊抑或係TVB都好，仍然有進步空間：「其實仲有好多嘢可以改善，今次劇集出街，喺100個人裏面，我肯定講係有99個人唔相信呢套係TVB嘅劇，佢哋覺得個劇情好新鮮，節奏好快，同呢49年嚟拍過嘅劇係兩回事，無論係4K、全實景、用電影嘅器材、拍攝時間，尤其係演員嘅充足休息時間，呢個其實係好重要嘅問題。」大家都知道喺TVB拍劇，通常係有開工冇收工時間，直踩26、27個鐘已經見慣不怪，林文龍話：「喺TVB嘅營運模式都係外景接廠景，廠接外景，幾日幾夜唔瞓覺，係好普通嘅事，但係事實上無論係18、22又好，60、70都好，係需要時間休息，除咗俾你調整精神狀態之外，亦都要俾你返去做功課，而唔係機械式咁啤、啤、啤出嚟，冇時間去觀察身邊嘅嘢，冇時間去創作，冇足夠嘅時間休息，又點會有好嘅表現出嚟？」林文龍更以自身經驗做例子：「好記得嗰陣喺9幾年，我同萬子哥（萬梓良）拍《萬里長情》，嗰場戲講我哋敵視對方，一人一部機close up我哋，敵視怒睥，但係好對唔住，我幾日冇瞓覺，就算我有幾好戲，我對眼真係冇晒力，頂到頂唔到跌咗落嚟。我當然好想做好嗰場戲，但係我精神狀態真係配合唔到，演員都係人，都係需要有適當休息時間，不過呢套劇我係有8至10個鐘頭休息，唔只係我，仲有其他演員都係一樣。」有得休息已經係奇聞，仲講緊最少有8粒鐘，簡直令人葡萄！林文龍話：「唔只招人妒忌，大家都係講緊同一句說話『死喇，我哋拍完呢套劇，要返番去廠景接外景，外景接廠嘅日子，真係返唔到轉頭。』你睇落去，好多演員嘅狀態好好，有足夠時間做功課，喺現場演員有時間去溝通，導演會同大家做啲練習，點樣可以做得更好。係喺舊世界，我一日排你10幾20場戲，仲喺度問我呢啲嘢，拍喇，甚至乎做得唔好，想NG都唔得，因為仲有好多場要拍，所以咪影響咗個質素。」林文龍亦提到另一個體會，佢話：「喺舊世界裏面，一套劇出街，焦點通常係喺主角身上，但係呢套戲出咗街，喺戲裏面一啲小角色，都有好大嘅迴響，多咗啲傳媒朋友嘅關注同訪問，得到認同得到尊重，呢個喺公司嘅文化裏面，出現好嘅影響，呢個價值其實係對每一個人都好重要，我諗經過今次咁多迴響，將來再出現啲新角色，我諗佢哋都會好期待，希望有新嘅迴響。」服裝提供：Agnès b.
場地提供：The AIR (The ONE)
| 採訪：何慧斯 攝影：陳俊強 | | |
| | | |
| |
|
鍾意就快D Share啦！
|
|
|