Treegun同前黨友及內地友人喺海南島租地種番薯，因為咁反而唔得閒理政治，呢期周浩鼎同 689扯貓尾事件，佢更加無咩興趣理。（相片由鍾樹根提供）
八卦陣
Treegun調理農務 海南種番薯
民建聯呢期力撐自己黨內新星周浩鼎，隨時要賠上個黨僅有嘅名聲。民記呢期惹火，搞到上年退咗休嘅前主席譚耀宗，都要出動，用佢老人家嘅歪理幫手撲火，但曾經係民記重炮手嘅 Treegun鍾樹根就一於少理，佢上年立會選舉被迫讓位俾張國鈞要排第二出選，結果連任失敗；事隔半年多，佢原來有新搞作──調理農務。
Treegun同《壹》仔講，佢而家好「冷感」（喺政治方面），只係鍾意做農夫，仲匿埋種番薯。原來佢雙失冇咗立會同區會議員工作後，同一樣冇再做議員嘅黃容根同李國英，加埋一班內地朋友，喺海南島租咗七百畝地種番薯，「番薯營養價值高、高纖維、又抗癌，而且好易種，有沙泥嘅地方就種到。」佢話主要種黃心、白心呢啲本地品種，但如果客人有需要，都會特別種紫薯。不過香港暫時食唔到 Treegun牌番薯，皆因佢哋只做海南島內銷。
Treegun而家一個月要飛幾次海南睇番薯，番薯一年有三次收成，佢哋就簽咗十年租約，短期目標係發展至二千畝，仲諗住成立個人品牌。 Treegun對呢盤生意好樂觀，仲話：「衰咗都係冇咗十萬（投資）啫。」
罕有病童故事有回響 家屬感謝港人支持
上期《壹》仔報導過幾位患上罕有病嘅小朋友故事，引來好大回響，唔少讀者主動聯絡《壹》仔，關心佢哋之餘，亦希望可以幫吓佢哋。
對於成立慈善基金提供幫助，患上非典型溶血症尿毒症候群（ aHUS）嘅 Kyle，佢媽媽張太就婉拒咗呢份心意。佢話，因為囝囝嘅藥物需要長期使用，但 Kyle而家要換腎，所以唔可以用藥住，加上囝囝未能夠即時換腎，同屋企人商量過後，為免 hold住善心人嘅捐款，所以呢刻唔想接受捐助。
其實張太兩個仔所需要嘅藥物，對上一次喺醫管局藥物建議委員會闖關，已經係一五年十月嘅事。根據醫管局網頁，委員會當時以冇足夠理據支持藥物治療嘅成本效益為由，唔准將隻藥納入藥物名冊。不過，香港罕見疾病聯盟業務發展主任賴家衞就話，隻藥最快七月中，可以喺委員會會議上，獲納入藥物名冊嘅安全網範圍，一旦成功，就可以進一步納入關愛基金嘅試驗資助計劃，所以如果一切順利，張太一家今年十二月就會獲得資助，算係一個遲來的喜訊吧。
年輕化的財爺？歐陽伯權六十有四
無人肯入熱廚房，林鄭組班工作難度甚高，近日最新嘅進展，係林鄭推薦緊新人選做財爺，此君正係今年情人節宣布退休嘅前信安金融集團亞洲區主席歐陽伯權（ Rex）。
口說退休但退而不休，同林鄭言行一模一樣。知情人士同《壹》仔講，歐陽伯權等緊中央審批，但中央對陳茂波冇太大不滿，唔排除會令林鄭換人願望落空，仲令佢選舉時強調財金班子換人嘅承諾率先「彈票」。
林鄭一面私下放風話滿意陳茂波表現，但同時透過陳智思不斷搵人，鐵心想換走波叔，無非係認為佢梁粉形象深入民心，但歐陽伯權一樣係梁粉底。六十有四嘅歐陽伯權，年紀大過晒咁多任財政司司長，若果佢真係上任，肯定係香港史上最老財爺，到時，林鄭所謂嘅管治新風同年輕化，又係得個講字。
另外， Rex中學後移民咗去加拿大讀書，畢業後長年喺北美打工。如果佢上任，睇怕又要先搞清國籍問題先囉。
頭痕半年 袁國強焗住再坐一會
本來諗住離開熱廚房嘅律政司司長袁國強，似乎應該會「再坐一會」，幫手搞埋高鐵一地兩檢嘅爛攤子。
《壹》仔喺上年十二月中，獨家影到袁國強、張炳良同譚惠珠前後腳去政務司司長官邸，呢個組合不免令人聯想到同一地兩檢有關。
睇番資料，一地兩檢喺上年十二月都幾受關注，先有立法會鐵路事宜小組主席田北辰爆料，話收到風兩地政府已就一地兩檢有定案，最快一月公布；之後港鐵主席馬時亨又打開口牌，話期望未來半年解決一地兩檢同高鐵管理權問題。而當時梁振英宣布咗唔連任，林鄭於是臨危受西環之命上陣，似乎由部署出選時，已經預咗要處理一地兩檢呢個政治炸彈，以至要同袁國強等人密斟一番。
查實，一地兩檢問題棘手，雖然特區政府研究咗最少八年時間，但最後極可能還原基本步，即係用霸王硬上弓方式，將西九高鐵站割讓俾大陸執法。
撰文：巫不言
|
鍾意就快D Share啦！
|
|
|
