掃呢頁CODE去手機

2017年6月15日 星期四

裝修登台撈得掂 《畫出彩虹》詹秉熙:當年曇花一現 為生活拍三級片 [壹週刊 - 1423] __,詹秉熙,M1,

詹秉熙與林偉健開的裝修公司已營運一年,近日由鴨脷洲搬到紅磡。兄弟檔默契十足。探熱針裝修登台撈得掂 《畫出彩虹》詹秉熙:當年曇花一現 為生活拍三級片「在 ...


詹秉熙與林偉健開的裝修公司已營運一年,近日由鴨脷洲搬到紅磡。兄弟檔默契十足。

探熱針

裝修登台撈得掂 《畫出彩虹》詹秉熙:當年曇花一現 為生活拍三級片

「在天空上,用我的愛去畫長虹……」

84年大台青春劇《畫出彩虹》,大膽起用訓練班畢業生詹秉熙孭重飛做男一,配當年新女張曼玉。新人對新人,結果一劇成為詹秉熙男一的「絕響」,之後為搵食,拍過三級片。

今年 56歲的詹秉熙,依然是演員,同時是製作公司老闆,近年又孖住老友,體操王子林偉健搞裝修公司,以知名度做生招牌。代表作《畫出彩虹》雖只為他帶來曇花一現的光芒,但足以夠食老本。

出道捧上天難消化

當年詹秉熙的處男作《畫出彩虹》,拍完後勁不繼,往後發展如劇名,連他也說:「曇花一現,出現得好快,但亦好快冇咗。」

當日與剛剛當選港姐的張曼玉,被大台欽點孭重飛。坐得男女一,觀眾預咗得,男女主角一跳就上最頂,結果詹秉熙上得高跌得快。

八四年大台訓練班改制,他是改制下的第一批學生,也是大台捧人新策略的白老鼠,成敗與否,總叫詹秉熙有套代表作。「一出道做男一究竟係好事定壞事,當時覺得係好事,但亦講真一句,根本好多嘢都處理唔到,包括面對環境同人事。讀完訓練班,錄影廠都未摸熟,台前幕後冇個識就拍嘞。當時冇飄飄然感覺,因為根本都消化唔切,一嚟就孭重飛。

之前簽港視拍《導火新聞線》、《選戰》等,一心再續幕前夢,點知港視不獲發牌,詹秉熙說:「當刻真係晴天霹靂。」

攞住自己畫的彩虹畫作,詹秉熙話:「我嘅彩虹人生就係電視圈嘅時候,出現得快走得快。」

當年跟張曼玉合作,詹秉熙說:「同佢幾夾,可能大家都係新人,易溝通。」之後女的事業扶搖直上,二人合作一劇後亦冇聯絡。

《畫出彩虹》的劇情,是一個漫畫主筆奮鬥史。

唔知得罪邊個

「一個新人,你想我可以幾好啫,我都想好,盡晒力㗎嘞!當年有個前輩同我講,你可以噏得晒啲對白已經當贏。不過再俾我揀,我寧願慢慢捱上去好啲,你浸咗一段時間,好過盲頭烏蠅做男一,嚟得太快。」

一劇主角,之後有傳詹秉熙得罪高層,力捧變雪藏。問他當年是否年少氣盛,詹秉熙說:「當年傳我俾人雪藏,我都想知咩事!到依家我都唔知得罪咗邊個。當時日拍夜拍,瞓覺時間都冇,由細到大未試過咁攰,可能有人叫我,我攰到唔識應佢,就係咁出咗誤會。當年一嚟就做男一,聽到唔少難聽說話,話你係監製、老闆嘅咩人,乜關係,乜都有。」

EYT是避風塘

詹秉熙的長女今年十九歲(右二),幼女十四歲(左一)。長女半歲時曾因腦出血,要做腦手術,之後更長期服藥,亦令他倍感珍惜家庭生活。

之後男一被打落「凡間」做《 EYT》,詹秉熙反而視為天堂。「其實我唔係被雪藏,我係調咗去做 EYT(歡樂今宵),當時我唔識諗係咪事業下滑,只知道每日對住班前輩,鵬哥(盧海鵬)、阿姐(汪明荃)、何 B(何守信),學做 Live,反而好開心。好在我份人冇乜所謂,所以之後冇再做男一,冇介懷亦冇唔舒服。」他說。

用力衝破拍三級片

他在大台安守本分六年,九○年跳槽過亞視,又回巢過無綫。九三年為生活,走上三級片之路。「搵食嘛,不過都要用力去衝破心理障礙,因為家人都有怨言,最後諗通拍三級片,係覺得觀眾唔係睇男人,所以拍時對我有足夠保護已經 OK啦。」

一套代表作足令詹秉熙走天涯,多年來內地登台長做長有,今日做埋製作公司、裝修公司老闆,詹秉熙三個字可以做生招牌,籌碼源於《畫出彩虹》。

兩兄弟離開大台後都拍過三級片。不過論數量,林偉健大勝。他說:「跳去影圈,食正三級片盛行,咁咪順住個勢去拍,冇得揀。」

電影《金瓶梅 II愛的奴隸》

56歲失婚的林偉健,說最想拍一套以他這個年紀的愛情故事。「中年嘅愛情一樣有味道,到依家我仍然追求轟烈嘅愛情。」問他有無遇過轟烈的愛,他說:「同黃曼凝嗰段,係初戀好 pure,不過分手後大家冇聯絡。至於陳梅馨只係好短暫,冇咩感覺。」

陳梅馨

黃曼凝

轉戰裝修 兄弟檔開過夜場

除拍住上做裝修,早在 04年他們已在深圳開過卡拉 OK夜總會。林偉健說:「我哋只係小股東,負責做交際花(公關),哈哈!」詹秉熙續說:「雖然生意幾好,但晚晚劈酒好傷身。佢(林偉健)可以一晚飲 60罐啤酒,我真係唔得。所以做咗三年頂唔順,大家一齊退。依家做裝修雖然競爭大,但投資風險低,我負責對外見客,有客認得我,不過唔會因為咁平啲。」

二人各投資五位數字開裝修公司,門口仲貼埋靚仔相做生招牌。

04年兩個拍住上做夜場生意。

詹秉熙做裝修並非門外漢,十多年前在亞視時,為搵多條出路,跟裝修師傅學度尺,畫設計圖。這些是他們裝修前後完成作。

撰文:娛樂組

攝影、攝錄:蘇銘賢

場地提供: G. Guisine


鍾意就快D Share啦!