詹秉熙與林偉健開的裝修公司已營運一年，近日由鴨脷洲搬到紅磡。兄弟檔默契十足。
探熱針
裝修登台撈得掂 《畫出彩虹》詹秉熙：當年曇花一現 為生活拍三級片
「在天空上，用我的愛去畫長虹……」
84年大台青春劇《畫出彩虹》，大膽起用訓練班畢業生詹秉熙孭重飛做男一，配當年新女張曼玉。新人對新人，結果一劇成為詹秉熙男一的「絕響」，之後為搵食，拍過三級片。
今年 56歲的詹秉熙，依然是演員，同時是製作公司老闆，近年又孖住老友，體操王子林偉健搞裝修公司，以知名度做生招牌。代表作《畫出彩虹》雖只為他帶來曇花一現的光芒，但足以夠食老本。
出道捧上天難消化
當年詹秉熙的處男作《畫出彩虹》，拍完後勁不繼，往後發展如劇名，連他也說：「曇花一現，出現得好快，但亦好快冇咗。」
當日與剛剛當選港姐的張曼玉，被大台欽點孭重飛。坐得男女一，觀眾預咗得，男女主角一跳就上最頂，結果詹秉熙上得高跌得快。
八四年大台訓練班改制，他是改制下的第一批學生，也是大台捧人新策略的白老鼠，成敗與否，總叫詹秉熙有套代表作。「一出道做男一究竟係好事定壞事，當時覺得係好事，但亦講真一句，根本好多嘢都處理唔到，包括面對環境同人事。讀完訓練班，錄影廠都未摸熟，台前幕後冇個識就拍嘞。當時冇飄飄然感覺，因為根本都消化唔切，一嚟就孭重飛。
唔知得罪邊個
「一個新人，你想我可以幾好啫，我都想好，盡晒力㗎嘞！當年有個前輩同我講，你可以噏得晒啲對白已經當贏。不過再俾我揀，我寧願慢慢捱上去好啲，你浸咗一段時間，好過盲頭烏蠅做男一，嚟得太快。」
一劇主角，之後有傳詹秉熙得罪高層，力捧變雪藏。問他當年是否年少氣盛，詹秉熙說：「當年傳我俾人雪藏，我都想知咩事！到依家我都唔知得罪咗邊個。當時日拍夜拍，瞓覺時間都冇，由細到大未試過咁攰，可能有人叫我，我攰到唔識應佢，就係咁出咗誤會。當年一嚟就做男一，聽到唔少難聽說話，話你係監製、老闆嘅咩人，乜關係，乜都有。」
EYT是避風塘
之後男一被打落「凡間」做《 EYT》，詹秉熙反而視為天堂。「其實我唔係被雪藏，我係調咗去做 EYT（歡樂今宵），當時我唔識諗係咪事業下滑，只知道每日對住班前輩，鵬哥（盧海鵬）、阿姐（汪明荃）、何 B（何守信），學做 Live，反而好開心。好在我份人冇乜所謂，所以之後冇再做男一，冇介懷亦冇唔舒服。」他說。
用力衝破拍三級片
他在大台安守本分六年，九○年跳槽過亞視，又回巢過無綫。九三年為生活，走上三級片之路。「搵食嘛，不過都要用力去衝破心理障礙，因為家人都有怨言，最後諗通拍三級片，係覺得觀眾唔係睇男人，所以拍時對我有足夠保護已經 OK啦。」
一套代表作足令詹秉熙走天涯，多年來內地登台長做長有，今日做埋製作公司、裝修公司老闆，詹秉熙三個字可以做生招牌，籌碼源於《畫出彩虹》。
56歲失婚的林偉健，說最想拍一套以他這個年紀的愛情故事。「中年嘅愛情一樣有味道，到依家我仍然追求轟烈嘅愛情。」問他有無遇過轟烈的愛，他說：「同黃曼凝嗰段，係初戀好 pure，不過分手後大家冇聯絡。至於陳梅馨只係好短暫，冇咩感覺。」
轉戰裝修 兄弟檔開過夜場
除拍住上做裝修，早在 04年他們已在深圳開過卡拉 OK夜總會。林偉健說：「我哋只係小股東，負責做交際花（公關），哈哈！」詹秉熙續說：「雖然生意幾好，但晚晚劈酒好傷身。佢（林偉健）可以一晚飲 60罐啤酒，我真係唔得。所以做咗三年頂唔順，大家一齊退。依家做裝修雖然競爭大，但投資風險低，我負責對外見客，有客認得我，不過唔會因為咁平啲。」
撰文：娛樂組
攝影、攝錄：蘇銘賢
場地提供： G. Guisine
|
鍾意就快D Share啦！
|
|
|