旅遊書銷量創佳績，但當讀者跟著書本去旅行，中伏情況同樣出色。《蘋果》綜合旅遊書4大伏位，錯地址、錯交通、「照騙」、誇張失實樣樣齊。才子陶傑稱旅遊書盛行 ...
旅遊書銷量創佳績，但當讀者跟著書本去旅行，中伏情況同樣出色。《蘋果》綜合旅遊書4大伏位，錯地址、錯交通、「照騙」、誇張失實樣樣齊。才子陶傑稱旅遊書盛行皆因畸形「劏房經濟」，令年輕人放假都要看攻略書善用每一刻，頓失旅行悠閒意義，「越暢銷越覺得香港好悲慘。」市民Gary表示去旅行必定會買旅遊書，以了解當地飲食及觀光資訊，但卻因盲目相信內容不慎中伏，「試過跟住地圖去，明明佢寫個地方係A區，原來真正地址喺C區，中間都爭咗一段路」，全靠自行Google才發現出錯。經一事長一智，他現時雖然會繼續買書，但同時會做多手準備，「旅遊書都係Roughly咁去睇，同時會上網摷吓資料，唔會再rely on一個source。」交通同樣可以出事。旅遊資訊網Travel Pop負責人Francis表示，早年去台灣時，試過按旅遊書上的資料去坐車，「去到一個地方打算等巴士，結果搵嚟搵到都搵唔到，一問人先知道，原來成條巴士線冇咗。」他指個別地方變化快，有時書籍未必能及時更新。以自駕遊為主的梁小姐卻屢被書上照片所騙，試過去台灣某個地方，「影相出嚟好靚最吸引，去到原來得一個corner」。她坦言旅行本質是要「Hea」，「但揸咗成個鐘車去，都會覺得好哂時間囉。」Flyday.hk 負責人Herman則是誇張失實介紹的受害者，「同班友去菲律賓玩，見到本書主打係一個郊區嘅Resort，所以就用啲時間去」。但當到達目的地時，他卻有截然不同感受，「係有按摩有自助餐，但同佢文字介紹完全係兩回事，全部差咗一截。」經常到訪日本的Yannis亦指，試過按書本介紹到大阪著名鰻魚飯店，「人氣唔知幾多粒星，好食又五粒星，排咗九個字，發現同香港食都冇乜分別。」作為城中著名知識份子，才子陶傑坦言自己早已脫離Tourist（遊客），成為Traveler（旅行者），著重旅行時的心靈感受，認為不值得花錢買攻略式旅遊書，「好似馬可孛羅，佢冇講過去中國嗰程船幾多錢，亦都無講皇帝嗰餐係幾多金幣，而係講自己旅行所見所聞，咁先至值得流傳後世。」陶傑認為暢銷只因本地畸形的「劏房經濟」，「年輕人一個月搵萬零蚊，劏房交租畀咗6、7千，辛苦儲錢去玩，唔怪得佢哋要睇攻略書」。他指旅行意義在於悠閒，「悠閒係要有多餘錢，好似用一日時間去海邊睇海鷗，佢（年輕人）覺得嗰日係好嘥」，慨嘆旅遊書越暢銷，「越覺得香港好悲慘，係好悽涼。」記者 佘錦洪【旅遊書4大伏位】
1. 錯地址：地圖將景點標於A區，但實際地址卻在C區
2. 錯交通：書中記載的公共交通如巴士路線早已取消
3. 照騙：書中相片吸引，但原來只是放大景點最好的一角
4. 誇張失實：對景點或餐廳介紹天花亂墜，與實際情況差異甚大
