36歲嘅樂基兒(Gaile)，2012年同黎明發聲明宣佈離婚，結束4年婚姻。回復單身嘅黎明，寄情工作；樂基兒呢，感情生活卻多姿多采。近日有傳佢同拍拖兩年、做有機食物網上生意嘅才俊Ian Chu會喺8月喺美國結婚，男方更一早喺舊年、即樂基兒生日時，拖手仔飛抵三藩市見家長兼求婚。《蘋果》今日就搵到Gaile親自求證，佢承認今年8月會再婚：「喺8月結婚，日子、地點就唔詳細講，可以講唔係喺三藩市，喺加州舉行。」本報曾試圖聯絡身在大陸開工的黎明，但一直未能聯絡上。「我哋只係想要一個好小型同簡單、屬於我同佢嘅派對，大概喺50人到，主要係我哋雙方家長同親友。」問到未婚夫Ian邊方面打動到她？Gaile稱想保持神秘，堅拒透露，只補充謂會於美國舉行儀式，但在香港就唔會擺酒。Gaile提供的婚相，只得二人嘅各自的獨照，Gaile身穿綠色連身裙，而Ian就一身西裝襯波鞋，小型飛機為道具，四野無人，只見一片草原同一個白色小涼亭，餐枱上就已經預備好鮮花、酒同戒指。何以沒有合照？Gaile笑言：「地點附近冇人喺度可以幫我哋揸機影合照。」問到佢幾時訂婚，Gaile就話喺舊年8月：「同佢去咗加州北部嘅小鎮Sonoma County，話同我慶祝生日，要搭小型飛機去一個特別地方食生日飯，叫定我要盛裝，去到當地先知佢係求婚。我以為係切蛋糕，點知係收戒指，嗰個地方係佢上網搵 嘅。」其實，Gaile同Ian多次被傳媒影到拍拖都未公開戀情，直至去年元旦才喺Ig公告戀情，二人喺生活同性格上都好夾，不過當時Gaile曾接受訪問，話明唔會再婚。拍拖兩年多，兩人終認定對方。Ian同Gaile一樣，都曾經離過婚，最後還成功令對方改變初衷——決定再婚。兩人對結婚決定審慎，故對組織新家庭都已有共識。那婚後會否生BB，Gaile就表示未有計劃，下星期仲會去泰國上瑜伽導師訓練課程。對於周刊報道指她身型胖了有孕味，Gaile否認：「係戒咗煙同呢排成日食pizza，一直都好想戒煙，覺得味好臭同為健康著想，同埋我真係希望早啲可以戒到煙同早啲接觸到Yoga，做Yoga真係改變咗我好多，令我一年好過一年。」
|
鍾意就快D Share啦！
|
|
|
