身家翻四番，仲唔係小富婆！
藝人呂晶晶近年中港兩邊走，又懂得理財，被指是圈中小富婆，晶晶自言幕後有個投資顧問，只愛買磗頭，十年前已積極買大陸樓，依家升價三、四倍，揚言磚頭最保值，會繼續密密做密密買。
買磗頭最穩陣
藝人呂晶晶被指是圈中小富婆，她自讚自己英明，錢不會過自己手，全交由媽咪打理，她說：「我大部分收入都會畀晒媽咪，細個唔識理財，依家當然要多謝佢幫我儲錢，我可以賣樓，如果錢喺我手，我一定會使晒，我冇咩錢觀念，見到靚嘅、鍾意嘅嘢就會忍唔到手買。（你係圈中小富婆？）要多謝媽咪，佢識投資，畀意見叫我買樓，樓最保值，儲夠錢就買樓。（手上有幾多樓？）唔多，我有自住又有投資，咁好正常，唔係小富婆。（手上啲樓升咗幾多？）我十年前買，價錢較平，主力家鄉杭州買樓，雖然唔係一線大城市，但最少都升咗三、四倍，買磗頭最穩陣，蝕就唔好賣，等賺咗先賣。」
唔想同外國人拍拖
晶晶即將開拍《隱世者們2》，早前趁有空檔，努力學英文，她說：「一直覺得英文唔夠好，想有進步，搵私人教練學咗半年，因為大學畢業冇咩接觸英文。（搵個外國男友？）冇咩機會接觸外國人，我圈子細，如有都可以交個朋友。（接唔接受到同外國人拍拖？）唔係好接受到，思維方式、溝通都會有小小擔心，都係鍾意中國人多啲。」
照顧母親少出街
晶晶父親去年過身，本來在杭州住的媽咪，現搬來香港與她同住，她說：「屋企得我一個女，要照顧媽咪，佢嚟咗香港，自己好大責任照顧好佢，因為對我嘅生活好大轉變，以前放好多心思喺自己身上，但依家生活重心轉移咗，想媽咪開心，顧佢多過顧我，少咗出街。（變相冇機會拍拖？）真係冇咁嘅時間。（媽咪想唔想快搵個伴？）佢以前想，佢都好心急，呢兩年冇再特別催，可能見到我成熟咗，緣分出現就會出現，出現就好好把握，未就唔好咁強求。」
來源 source: http://hk.on.cc
|
鍾意就快D Share啦！
|
|
|
