為超雲割席6年 機緣破冰
陳山聰伍姑娘一吻解千怨
有緣千里能相會，現年48歲的伍詠薇與40歲陳山聰，因山聰11年搭上賭王千金何超雲，他為愛情疏遠友儕，跟伍姑娘絕交，契姊弟斷交6年，前晚在東京相約世紀破冰飯局，兩人咀嘴牽手冰釋前嫌，山聰更感觸說：「一吻解千怨！」
【High爆扮咀】
斷交6年的伍詠薇與陳山聰，前晚相約在東京飯局破冰，作狀咀嘴。
伍詠薇與陳山聰曾幾何時是糠黐豆契姊弟，可是山聰自11年成功追到賭王何鴻燊三房千金何超雲，有指同年10月，伍姑娘向當年35歲牛一的契細佬山聰講生日快樂，對方忽變臉叫伍姑娘以後不要再聯絡他，辣㷫伍姑娘在微博宣佈要跟「一個人」割席，外間即估到那個人就是山聰。伍姑娘與山聰斷交6年，前晚卻在東京相約世紀破冰飯局，姊弟握手和好。
伍姑娘和山聰其實早於前年曾在胡杏兒婚宴遇上，兩人有打招呼，但關係仍冰封，伍姑娘曾謂：「有仇唔會記一世。」天時地利人和，上周她與山聰巧合地於同日在港出發去東京，於機場遇上，大家就相約在東京見面。這餐世紀破冰飯局前晚成事，伍姑娘和山聰席間興奮牽手，更拍下「復交照」貼Ig，伍姑娘留言：「今晚我終於拉返他上我的巴士，跟我一齊坐呢一程列車，一直到永遠……」山聰則留言：「等咗咁多年，今日終於可以牽着你的手，感恩。」之後山聰再貼兩人作狀咀嘴合照後說：「一吻解千怨！盡在不言中！I love you！」
【影全家福】
陳山聰帶女友Apple（左一）與契家姐伍姑娘及老公練海棠（右二）一晚食足三場，席上還有山聰胞兄（右一）。
陳山聰於11年戀上何超雲，有指他當時沉迷拍拖，疏遠朋友。資料圖片
一晚食足三場
記者前晚聯絡正與山聰食飯的伍姑娘，她high爆說：「我哋飲緊嘢，未醉，好開心。」問到山聰如何𠱁回她？伍姑娘繼續爆：「佢冇𠱁番我，根本就冇事，只係timing好準確，所以緣份拉埋我哋同一班機飛嚟日本，緣份拉我哋喺番埋一齊，盡在不言中。天時地利人和，我愛陳山聰！」陳山聰前晚也以短訊回覆傳媒：「估唔到喺日本重遇，真係緣份，感恩！」
前晚世紀破冰飯局，席上還有伍姑娘老公練海棠、山聰女友Apple及山聰胞兄陳山海，伍姑娘形容這是「全家福」，五人笑容一致，日本通山聰更帶大家夜蒲食好西，一晚轉三場，伍姑娘表示會珍惜兩人間未了緣，她昨日再在電話中說：「我會珍惜，噚晚由山聰帶我哋喺澀谷食咗三個地方，食物唔重要，大家唔喺香港，旅行心情，放開心情相處番，我同佢都好感動。大家喺歡樂氣氛傾偈，好盡興、好滿足。我哋稍後仲會一齊拍新劇《飛虎極戰》。」
【世紀拖手】
伍姑娘和陳山聰前晚牽手復交。
陳敏之（左）期待跟伍姑娘和陳山聰相約飯敍。資料圖片
「今年最好禮物」
伍姑娘玩到昨日凌晨1時許，心情大靚離開，山聰同樣難掩興奮，他昨日回覆傳媒：「好多朋友WhatsApp恭喜，搞到好似結婚咁，開心嘅，係緣份到。」他形容與伍姑娘冰釋前嫌是今年最大收穫：「感恩上天今年給我一份最好的禮物。」又承諾會更珍惜這段曾經失去的友情：「經歷過一啲嘢，對我嚟講，呢份情更加珍惜，我得嚟不易。」山聰與女友Apple感情穩定，可有結婚計劃？他說：「搵吓錢先。」伍姑娘夫婦昨先回港，山聰則於當地多留一天。此外，契妹陳敏之也戥伍姑娘和山聰開心，她昨說：「家姐開心就OK，大家成年人嚟，好多嘢要放下，等佢哋返嚟一齊食飯敍吓。」
採訪：嵐山、楊定
|
鍾意就快D Share啦！
|
|
|