「生煎王」蕭潤邦（Oscar）早前在網誌公開戀情，上載與女友江若琳（Elanne）背面合照，成功溝掂大眼妹Elanne的Oscar頻頻在網誌「放閃」，近日更在左手紋上女友英文名「E」字的愛的紋身，Oscar出席大埔分店開幕，榮升「生煎包妻」的Elanne以女主人身份在場招呼朋友，更與未來奶奶蕭太齊齊切燒豬，Oscar與Elanne大方一齊受訪，女方全程冧爆望實男友，而Oscar不時掃女友背脊，相當Sweet。
大方晒紋身
對於愛的紋身，Oscar初以「怕醜」不想公開紋身，最後亦大方讓記者拍照，並承認首次為女友紋身，他說：「紋身師傅紋字母好叻，所以紋個E字。（媽咪有冇呷醋？）紋咗其他地方，喺心入面，佢叫Peggy姐。」身旁的Elanne甜笑說：「之前真係唔知佢紋身，好驚喜同好開心。」記者笑兩人要一生一世，Oscar說：「梗係啦。」Elanne插嘴說：「我有問佢如果有日.......啋！有叫佢搵啲叫Eva同英文名係E字頭。」抵死的Oscar笑說：「可能搵Eddie呢，轉一轉傾向。」並承認紋身E字上的皇冠是「女皇」意思。
等驚喜求婚
Elanne大讚男友是浪漫人，由於兩人拍拖後，Oscar連開兩間分店，即被讚旺夫，Elanne甜絲絲說：「唔係，唔係。（有冇畀股份妳？）我哋做嘢係分開。」Oscar說：「日後有機會我哋咪一齊開間叫夫妻肺片，橫掂我講嘢咁廢。」問到他何時向女友求婚？Oscar說：「會㗎喇，有安排，都走唔甩大家嘅法眼。」問到Elanne有否幻想男友求婚過程？她說：「冇，等驚喜。」當問到兩人會否再去旅行？抵死的Elanne說：「你哋又打黃槍？」身旁的Oscar爆肚說：「打手槍。（努力造人？）今日唔講造人，講開舖先。」Elanne大方表示不時與未來奶奶見面，Oscar即說：「媽咪讚佢又靚又孝順。」
|
鍾意就快D Share啦！
|
|
|