虎媽媽楊千嬅同丁子高嘅5歲獨生子Torres今年入讀小學，兩公婆為囝囝揀學校問題煩爆，為避開TSA唔想囝囝變繁忙兒童，早前一家三口現身加拿大國際學校面試，但原來最後千嬅兩公婆幫Torres揀咗另一間國際學校，就係每年學費逾15萬元嘅英基小學，上周五（2號）三人到學校出席新生日，被讀者劉小姐透過「爆相爆片」分享，當時所有小朋友都自己排隊上課室，但Torres就要媽咪拖住手仔行！劉小姐接受《蘋果》電話訪問表示，當日喺港島區嘅英基見到千嬅一家三口：「大約早上9點幾，當時所有小朋友喺禮堂集合，睇完圖書後一齊排隊跟老師上課室玩，而家長就留喺下面聽講座，但係千嬅嘅囝囝唔肯上課室，冇跟同學仔一齊排隊，要媽咪拖住佢上去。」問到Torres係咪扭計呢？劉小姐話：「我聽唔到佢扭計聲，但個個小朋友上晒去，佢哋最後先上去，所以大家都見到千嬅。」當時情況咪好尷尬？劉小姐坦言：「因為個個家長坐低預備聽講座，大家都見到千嬅拖住囝囝上課室，初時都冇留意係千嬅，見到佢嘅紫色頭髮睇清楚先知，之後冇見到佢同老公落返嚟聽講座，唔知佢咪佢哋太尷尬啦，大約個幾鐘之後可以走，都冇再見到佢哋。」從劉小姐提供相片所見，千嬅拖住囝囝快步行，Torres仲手指指表現活潑，表情唔見佢有扭計，似乎只係去到陌生環境比較嗲父母。而着黑色tee嘅丁子高就跟喺後面，手上攞住一叠學校章程，劉小姐話當日每個家長都有一份，內容包括學生幾點返學、學校理念、守則等等，所以千嬅同丁子高唔聽講座都冇問題。
|
鍾意就快D Share啦！
|
|
|