掃呢頁CODE去手機

2017年7月20日 星期四

六嬸買樓玄機 [壹週刊 - 1428 - 財經] __,六嬸,方逸華,M1,

六嬸可說是西貢的「地膽」,邵氏片廠、TVB舊電視城及她居住大宅都位於清水灣一帶。中環人語六嬸買樓玄機傳媒最光輝的買賣,有見於邵逸夫生前以一百五十億元把 ...


六嬸可說是西貢的「地膽」,邵氏片廠、 TVB舊電視城及她居住大宅都位於清水灣一帶。

中環人語

六嬸買樓玄機

傳媒最光輝的買賣,有見於邵逸夫生前以一百五十億元把一個舊媒體 TVB出售;自己手頭邵氏兄弟則仍揸住清水灣靚地皮,咁就叫靚刁。另一靚刁,係陳國強同六嬸三年前,以十五億元,把邵氏清水灣電視城及片場等地售予大陸民企復星國際( 656),六嬸賣得出嘅貨梗係諗過度過,呢幾塊片場地,要轉做豪宅,阻滯多多,涉及交通及保育問題,以六嬸八十三歲之齡,寧願掟億幾,幫襯新世界買六個「傲瀧」單位,過吓癮咪算,六嬸篤信風水,包圍住傲瀧兩座山頭綠油油,甚有靈氣,以往在 TVB電視城內,她亦專誠搵風水師安咗個「山神廟」,猶如土地公一樣,六嬸喺傲瀧買六個單位,甚有「玄機」,猶如插六支旗仔一樣,應番「六嬸」名分!

新世界發展的「傲瀧」,某些靚單位能遠眺青葱山景。

天價學籍真相

不少家長都渴望成為 Hong Kong Golf& Tennis Academy會員,讓子女跟名牌教練學習。

有個闊佬聽朋友講,可介紹入新世界旗下那個 Hong Kong Golf& Tennis Academy,謂入會費要二百萬,咁誇張,真係拍得住富豪級的波會?其實有長有短嘅,入學費兩年才十六萬,十年則為五十萬,早前曾設有百五萬全家的學籍,不過現已沒有。所以話有錢佬身邊都有好多搵飯食嘅友仔㗎!

中環寸嘴 國際金融白紙扇

楊國佳

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

《壹》仔賣盤,有好多老友打電話嚟:「喂,你冇地盤寫㗎」嘻,你唔使擔心我,我唔做食評家,可以做國際金融白紙扇。

香港坊間股評家,學似英國《金融時報》口吻,謂 A股入 MSCI,成年之後先發生,純粹只是個好開始,以大陸全世界第二大經濟體系,微不足道咁話。啲友都懵吓懵吓,人家玩緊 Morgan Stanley Index Fund,大鱷手頭買定 A股,要個 Index上就買貨,要 Index落就掟貨,舞高弄低控制自如,呢啲叫低成本高效益。其實呢啲遊戲規則大摩搞出來,等你啲友上晒腦,一篤個死穴就等你死咗都唔知發生乜事,唔係仲話乜熔斷機制,一陣又國家隊入市!

老友個老母開嘅跑馬地祥興茶餐廳,上週六 last day排長龍,老闆早已留定半打拿破崙蛋糕俾我呢啲熟客,無「飛士」都買唔到;呢款蛋糕,一層層酥皮夾住中式 sponge cake,個人喜好,一片一片來食,否則大啖咬就飽死荷蘭豆!

祥興茶餐廳賣咗個鋪位後,頂咗幾年最後光榮結業。

每件十蚊的拿破崙蛋糕已成絕響。

廠佬教訓鬼佬

建滔化工( 148)老細張國榮,每逢趁國泰( 293)股價低迷即大手買入,現持股 9%成為國泰第三大股東,計及大股東太古 45%、國航( 753) 30%。國泰在貨疏之下,好容易推高股價之餘,廠佬出身的張國榮在國泰董事會上亦有 say,只不過佢自認英文是「有限公司」,遂以寫信方式向管理層提意見,謂唔好做咁大筆燃油對沖,畢竟冇乜工業需求,油價易跌難升,張國榮以廠佬的眼光教訓班鬼佬,又幾啱聽嘅。

手頭現金充裕的建滔化工主席張國榮,以廠佬的角度向國泰指點迷津。

國泰業績因燃油對沖出現大幅虧損,據知,大摩是當中大贏家。


鍾意就快D Share啦!