現年35歲嘅薛凱琪(Fiona)，自入行後感情路上最為人熟悉嘅都應該係與房祖名嘅4年情，之後嘅緋聞男友包括方大同及威尼斯人賭場高層Reggie Martin，仲有同性密友林二汶，又被指dry足12年，其實佢邊有咁dry？你當佢個交往近4年嘅闊少男友兼馬主鄧浩基(Byron)invisible咩？Byron係隱形富豪鄧邦個仔，鄧邦係上市公司馬仕達國際控股有限公司獨立非執行董事，曾創立新加坡加拿大國際學校，擁有擎天半島等豪宅物業；Byron自己亦擁有陽明山莊物業和是「HAY RUN」（喜盈運）的馬主。早於2015年4月，《蘋果》已直擊阿Fi同Byron喺灣仔區二人世界，拍拖拍足四粒幾鐘再入埋酒店密會兩粒鐘。翌年兩人再被發現一齊睇電影《七月與安生》，但就非常避忌，因為阿Fi唔想公開。據知，Byron追咗佢好耐㗎喇！富二代，能夠長揸箇然係港女模範，但Byron呢位「隱形闊少」就相反——男嘅好想公開，女嘅就死口唔認。Byron對阿Fi亦真係相當長情，追求嗰陣已出動最老土嘅外母政策，「得米」之後情難自禁喺fb打上「In a relationship」，愛得公開；對於阿Fi死口唔認，Byron都照忍。【成個陽明山莊都知！】
百忍成金，日前《蘋果》就收到讀者爆料，話阿Fi同Byron已經結咗婚，更揭男方出車到大埔龍尾村接阿Fi密會！讀者續指，阿Fi經常出入陽明山莊時，對司機同保安員態度極差，經常呼喝人，仲話成個陽明山莊都知道添！《蘋果》向阿Fi求證係咪已經結咗婚啦，佢一聽到問題時，已經忍俊不禁：「其實我聽到呢啲咁嘅消息嘅時候我就會係最開心，因為消息越誇張，我就覺得越可愛。」「我承諾，結婚同生仔都會講，我笑係因為傳我結婚已經係入行已嚟第二次。結婚呢樣嘢其實冇得呃嘅，你有得查㗎嘛，所以如果呢單新聞出咗，最驚應該都係Paco（黃柏高）。」【富二代變脹爆唔開心】
至於同Byron關係，阿Fi就話：「之前大家已經影過佢，佢已經好唔開心，因為佢上次著咗件螢光黃T恤，影到佢好肥。」「其實佢係我一個由中學時候開始已經認識嘅好朋友嚟嘅，都識都好耐，所以我身邊嘅朋友呀，甚至我父母都好熟悉佢，我哋係會成日一齊出嚟食下飯飲下嘢。」之前阿Fi曾稱對方係健身教練，一時又話佢係舊同學，好難分到邊句真……咁點解成日都出入陽明山莊嘅？阿Fi稱：「我本身有好多朋友住喺入面，爸爸都係住喺入面，所以我成日會去嗰度個會所做gym啦、唱k啦、食飯啦，所以影到我喺嗰度出入都係好正常嘅事。」【我每次分手都要喊好耐】
而對於對工作人員態度差劣，阿Fi話：「其實嗰度嘅員工我一個都唔識，差唔多一句說話都冇講過，因為我出入都係去會所或者我爸爸屋企，唔會見到任何員工，我諗要訪問番嗰個可能唔存在嘅員工。」最後阿Fi話：「o依家仲係單身嘅，不過我講過，我結婚之前你問我我都係話自己係單身嘅，但係每一次分咗手之後你問返我，我又會話我拍過拖，所以你哋要自己慢慢去揣測，不過當我結婚我就會話俾大家知。我覺得拍拖係私人嘢，尤其是係分手嘅時候，女仔係特別慘，我由入行到o依家當然有拍過拖，但係我每一次都唔講，因為我每次分手都要喊好耐。如果我每次分手都仲要做訪問去解釋番點解要分手，我覺得咁樣係好錯嘅。」
|
鍾意就快D Share啦！
|
|
|
