啱啱過咗29歲生日嘅梁洛施（Isabella），雖然佢嘅外表同同齡嘅女仔冇乜唔同，但係佢嘅人生就認真與別不同，自從佢喺09年同城中超級王老五李澤楷生咗大仔長治，跟住再喺10年生咗一對孖仔H&N，即刻成為城中熱話，不過呢段感情最終都冇開花結果，喺11年佢哋共同發聲明宣佈分手，三個囝囝將一齊權養。回復單身嘅Isabella，主力照顧三個仔，其間曾經短暫復出拍戲兼做舞台劇。(新聞連結： http://bit.ly/2oLTe2S )唔經唔覺，大仔長治今年已經8歲，孖仔都已經7歲，為咗可以喺正常嘅環境下生活，佢哋一直定居喺加拿大生活，不過早前有周刊報道話，爺爺李嘉誠下令一年要見孫仔兩次，但為免俾人認出，所以唔會喺大時大節先返嚟，而且喺機場出入都會有保鑣辦手續，亦會由職員通道入閘，盡量避免行踪兼樣貌曝光。其實喺今年5月，曾經有讀者透過《蘋果》嘅「爆相爆片」，喺圓方見到Isabella一個人喺度買外賣，不過嗰陣身邊見唔到佢嗰3個囝囝，亦唔見有任何保鑣，急急腳咁買完外賣就離開。（ 新聞連結：http://bit.ly/2tMmsnR ）日前《蘋果》又見到Isabella，睇嚟佢返香港嘅時間都好密，不過今次唔係得佢一個，同行嘅仲有爹哋同一個餅印嘅大仔長治。嗰日大約12點鐘左右，Isabella同大仔長治喺陽明山莊嘆茶，本來同行嘅仲有一對孖仔H&N同埋梁媽媽，為咗唔俾人發現，佢哋選擇一張角落嘅枱，Isabella同長治亦選擇面向望牆嘅位置而坐，不過食咗冇耐，梁媽媽同H&N先行離開，得番Isabella同長治繼續飲。大約到咗1時15分，Isabella同長治離開酒樓，去咗門口等車，但係嗰陣唔見佢哋兩母子身邊有任何保鑣出現，唔知係咪呢個原因，Isabella嘅警覺性比平時高，不時周圍望，好快就發現有傳媒喺現場影相，Isabella即刻用身體檔住鏡頭，唔俾長治入鏡。同爹哋成一個餅印嘅長治，雖然已經去到媽咪心口咁高，不過仲好癡身，經常要攬實媽咪，搞到Isabella一方面要o氹阿仔，另一方面又要擋鏡頭，所以睇落有啲尷尬！之後有住客通知保安發現有人影相，一度報警，Isabella喺傳媒同保安擾攘緊嘅時候，發現架車仲未嚟到，最後佢為咗長治，走番入去大堂繼續等車。
|
鍾意就快D Share啦！
|
|
|
