下個月8號就48歲嘅樂壇天后王菲，近日秘密來港，但今次唔係會合情人謝霆鋒，而係陪前夫李亞鵬所生嘅李嫣來港吃喝玩樂周圍逛。噚日讀者Kim透過《蘋果》爆相 ...
下個月8號就48歲嘅樂壇天后王菲，近日秘密來港，但今次唔係會合情人謝霆鋒，而係陪前夫李亞鵬所生嘅李嫣來港吃喝玩樂周圍逛。噚日讀者Kim透過《蘋果》爆相爆片，表示前日下午約2點，喺銅鑼灣Cova見到王菲同囡囡李嫣，同行仲有助手、一位女性朋友及與李嫣差唔多年紀嘅小妹妹。Kim話與王菲同行嘅女性朋友預早嚟攞枱，王菲同李嫣隨後到餐廳，由於王菲高大，一身causal look都能散發星味，唔少食客都認得佢，Kim話﹕「王菲好低調，入到嚟專登揀個背住人嘅位置坐。見佢食量都幾大，因為主菜以外，沙律同pizza都係自助形式，佢行出行入幾次攞嘢食，唔係都幾難見到佢個樣。」王菲全程顧住食，都好少同人傾偈；反而囡囡李嫣較活潑好動，不時與同行嘅小妹妹一齊玩手機，有講有笑。期間有食客要求王菲影合照，身旁助手即攔截，王菲亦好決絕咁話﹕「我唔影相！」約一小時後，王菲戴番副黑超後，就埋單走人。據悉王菲今次只是短暫留港兩日，日前先俾網民影到同李嫣一齊去童裝部入貨。其實李嫣同媽咪一樣咁有時裝觸角，今個月初，李嫣與與黃磊嘅囡囡黃多多一齊去巴黎擔任春夏童裝騷嘅小模特兒。李嫣行騷時表現淡定有自信，毫不怯場，受訪時坦言自己比爸爸、媽媽更鍾意同朋友行街，對服裝配搭亦有研究，仲霸氣咁話﹕「雖然媽媽的衣服多，但我從來沒偷穿過媽媽的衣服和高跟鞋，我的衣服就很好看了。」被問到以後想做乜？佢表示未想好，演戲或唱歌都唔知道。
