【東方日報專訊】黎明、張智霖及陳小春假中環舉行音樂會，可惜天公不作美暴雨連場，令現場歌迷被迫淋雨，不少人於社交網鬧爆發洩。幸好黎明現身前就停雨，還使出金句及笑話息民憤。
昨晚黎明、張智霖（Chilam）及陳小春假中環海濱活動空間舉行「開心幸運里」音樂會，音樂會約於8時39分開始，但下午5時已有大批歌迷排隊入場。大會以安全理由及阻礙視線關係，不准帶雨傘、樽裝水及大型攝錄器材入場，但因為突然落大雨，令現場一片混亂，工作人員亦體恤觀眾，只「望一望」袋就放行，亦派發雨衣給入場人士。
一現身全場起哄
雖然大會早前已在官網Facebook公布不准帶雨傘，但現場有不少觀眾不滿其他人撐傘時，阻擋其視線而到大會官網投訴。到大約8時放煙花，又再落大雨，觀眾雖穿上雨衣仍全身濕透，只有在VVIP區的嘉賓有帳篷遮身就不用淋濕身。
幸好開騷前半小時，打頭陣的黎明發揮其「黎明」效應令上天停雨，當他一現身全場即歡呼尖叫，他及Chilam、小春於台上合唱《三人行》，黎明更爆金句安撫濕身觀眾：「一瞬間兩個世界，落完雨就兩個世界。」小春自言怕天雨影響令騷取消，又指Chilam有首歌差點因天雨而唱不到，幸及時修理好音響器材。之後三人輪流獻唱。
黎明又談及1981年16歲時在香港未考車牌，要黐同屋的哥哥去淺水灣等不同地方燒烤：「嗰時喺淺水灣喇叭如果播歌播得太大聲，隔籬住嗰啲外籍人士就會投訴，後尾就好細聲，好多人燒雞翼，隔籬有啲男仔有女朋友，嗰時我哋咁細個，見到人哋拍拖自己又冇，喺沙灘、返學都會播呢首歌，呢首歌好有回憶。」之後自彈自唱《有了你》。其後，黎明請旗下女歌手JC出場合唱，音樂響起時黎明又叫停，搞笑問JC可有聽過此曲？JC即說：「梗係聽過，唔敢呃你！」
台上大放笑彈
另外，小春自言昨日是其囝囝生日，黎明笑說：「咁又係，咁細個冇乜時間觀念。」當三人再合唱時，Chilam亦謂昨日是其媽咪生日，在後台已跟媽咪講生日快樂，黎明再笑言：「係呀，因為係伯母，所以有時間觀念。」全場即大笑。
文：音樂組
|
鍾意就快D Share啦！
|
|
|
