「無綫咪神」高海寧（高Ling）早排一句「我使逼婚？」，回應被傳嚇走緋聞男友音樂人鄧智偉，呢番說話一出，即有唔少人讚高Ling夠霸氣！哈哈哈，依家咩年代呀？身為時下獨立女性，會唔會講句「我使結婚？」至係真正有霸氣呀？我Nuts哥都唔怕你話我講嘢Mean，因為從高Ling往績睇，「逼婚」真係唔奇！事關高Ling有過好幾次先斬後「咒」紀錄，即係做咗某樣嘢在先，然後再對外界發表好藐嗰樣嘢嘅言論。
呢頭加塊布 嗰頭勁晒線
唔係咩？最近高Ling喺劇集《賭城群英會》比堅尼上陣，34D碧波蕩漾，但呢頭露完，佢嗰頭出席宣傳就話： 「着比堅尼着到悶，要『封胸』，等大家專注我演技。」你信呀？少年你太年輕了！因為類似嘅露完又藐言論，上年高Ling同陳煒、陳自瑤等喺無綫台慶跳肚皮舞已經出現過，高Ling當時被問做乜喺低V舞衣度畫蛇添足做手腳， 佢話：「舞衣太性感，自己加塊布！」講到好似好抗拒行性感喎！但兩個零月後，佢就喺instagram自動波，以白色喱士低胸吊帶衫，勁晒深長事業線，無限永續呢個「露完又藐，藐完又露」嘅手法，究竟邊瓣真呀？
唔使估！因為高Ling喺2012年做過才女出過書，裏面寫住「現在就讓我剝開一層一層的薄紗」，Wow ！薄紗已經性感，自己除埋更加誘惑，唔講仲以為睇緊《格雷的五十道色戒》，如果唔係記得高Ling原名係沈江莉，真係差啲以為佢叫菲菲，正如張繼聰喺《小男人週記3之吾家有喜》個Gag：「想入菲菲！」
高Ling呢種一方面自動波除衫，另一方面又揚言要封胸嘅七擒七縱絕技，不知羨慕死幾多吊高嚟賣嘅港女，雖然高Ling都被人定型係貪錢、想釣金龜，但出身女人街嘅佢，正如韋小寶出身麗春院，見盡人生百態，高Ling由細到大，就算只係間中幫屋企客串睇住個銀器檔，都足夠佢耳濡目染學番三兩招求生本能，學識點樣同人博弈、bargain ！「老細，條銀鏈咁貴，平啲吖！」個個睇檔都會係咁答：「賣一百，我都係賺你十蚊，啱啱夠交租同人工咋！」少年，你唔係信呀？
瞄準香港人失憶特性
高Ling何只唔係胸大無腦，佢直頭係深謀遠慮，尋日露完，今日話封胸，聽日又露過，進可攻，退可守，想靠男人咩，停喺「封胸」嗰日囉，成個決心洗底嫁人息影嘅良家婦女咁樣！想靠自己咩，明日再露囉，正所謂你的事業線如何，你的事業也必如何，我使結婚靠男人？呢招「露完又藐，藐完又露」瞄準晒香港人失憶特性，雖然香港人對呢種「執笠清貨最後數天」冇句真嘅營運手法唔陌生，但用喺封胸同「我使逼婚？」度就的確少見，但Nuts哥奉勸大家記住張無忌阿媽殷素素遺言：「愈係靚女，愈會呃人！」
|
鍾意就快D Share啦！
|
|
|
