「我X你啦王老吉(某七人花名)！」現年55歲嘅黃秋生老馬有火，前晚喺facebook揞名狂插「王老吉」，連珠炮發爆粗勁鬧：「你老X係你話我病成咁叫人唔好用我，係文雋同劉強話唔好咋。屎X鬼！部戲關你X事咩？嘉禾嘅，你㗎？仲有，乜原來啲頭髮同長鬚係你加嘅咩？原著漫畫你畫㗎？X碌！真係唔怕面懵。」火氣十足嘅秋生用99個字發洩怒火，有網民追問發生乜事？秋生留言回覆，終於開名鬧爆：「睇到段王晶講嘅嘢，講到自己幾大仁大義。人哋嘅功勞當自己嘅。」網民紛紛力撐秋生，留言幫手插埋一份：「王晶個X街，係咁啦。」、「大飛哥，你都無謂得罪王老吉因住冇飯開，要咬老本吖~~」經《蘋果》了解後，秋生喺fb所講嘅電影，就係喺98年接拍嘉禾電影《風雲：雄霸天下》扮演「劍聖」，呢部戲嘅導演係劉偉強，監製同編劇係文雋。《蘋果》致電問秋生「王老吉」係咪王晶？事隔一晚秋生收咗啲啲火：「我又冇指名道姓，只係講吓花名咁樣，自己喺度發吓爛渣發吓脾氣，因為見到段嘢，亦都無謂亦唔想引起紛爭，費事開名。」問到呢單嘢係咪90年代拍《風雲》舊事？秋生坦言：「應該係，噚晚(前晚)有朋友send咗段嘢畀我，你知夜麻麻睇到，黑又變成白，白又變成黑，跟住功勞自己領，但其實唔關佢事，而且我聽聞當日係佢叫人唔好用我。」秋生忍唔住翻舊帳，暗寸王晶：「吓，你叫人唔好用我！就算我唔敢肯定佢有冇叫人用唔用，但我起碼肯定唔係佢叫人用，仲有話個造型，人哋根本原裝漫畫係咁，佢真係當人哋馬榮成死㗎！話係佢自己諗喎，搵啲長頭髮同啲鬚冚咗個樣，邊有人講嘢講到咁衰格啫，所以火滾寫段嘢。」秋生續道：「但今朝諗吓諗吓，都係費事辣火頭，所以搵啲飲飲食食嘅嘢cover咗佢就算。你知啦，人有正常反應，尤其是對某人嘅反感。」問到當年王晶話唔用你，但劉偉強同文雋就堅持？秋生抵死話：「阿某人啦，用某人，王老吉，因為以前我嘅助理同電影人好熟，佢同我講，某人話我腫成咁唔好用我，但劉偉強堅持話唔好，如果人哋病成咁唔用就唔係幾好，雖然戲份唔多，但對我都係一個好大鼓勵，所以咁多年嚟我對好朋友心存感激。」幾乎被人打爛飯碗，秋生越講越火滾：「雖然係舊嘢，但舊唔舊都好，睇到佢講段咁嘅說話，人生凡走過必留痕跡，你講過嘅嘢有底，讚過學民思潮你唔記得啫，人哋有寫低有紀錄。」問到兩人仲有冇來往？秋生諷刺表示：「點會有來往，我都冇乜熱氣，唔使飲王老吉，借用啫，同涼茶王老吉冇關係，王老吉好好飲，香港名牌嚟。」
|
鍾意就快D Share啦！
|
|
|