張栢芝同兩個囝囝及一個外籍男勁Close！
藝人張栢芝近日開設咗新嘅社交網帳號，睇嚟佢真係好有心機去經營兼吸納粉絲，連日來不停上載相片同玩直播同網民互動。而昨晚，佢就上載咗同外籍男士促膝而坐交談以及一同用膳嘅照片，仲笑言話：「邊個咁衰偷影我哋」！
仔仔同外籍男關係好
另一輯相片中，見到栢芝同兩個寶貝仔Lucas同Quintus及該外籍男士打成一片，大家好融洽咁坐埋一齊，Lucas仲成個身「挨」晒落去個外籍男士度笑晒口，而栢芝又拖住個小妹妹一齊行街街，相信佢哋應該都好熟吓。兩個大人、四個小朋友一齊玩，真係好熱鬧呀！
素顏Look省鏡
到咗今朝（10日），栢芝一早起身後上載素顏自拍短片，唔化妝嘅佢一樣咁靚，真係得天獨厚喇！然後，佢就影咗大仔Lucas喺度照鏡、整理頭髮嘅相。下個月就10歲嘅Lucas開始注重打扮，身為阿媽嘅張栢芝都不禁留言話：「大個啦我就甩身，哈哈哈！」
大呻FB帳戶被封
未幾，張栢芝再開直播，穿上橙色背心嘅佢表示需要紙筆寫低今天要做嘅事情，結果佢走到下一層Lucas嘅房間搵仔，一入去就見到Lucas喺度用緊電腦，而細佬Quintus跟住就入埋鏡，真係好得意！張栢芝一手打開Lucas個抽屜。嘩！真係有好多文具，簡直樣樣有齊。張栢芝跟住又返去自己嘅房，然後話自己個Facebook帳戶被封鎖，仲帶點不滿咁反問點解要封鎖佢？又話一雞死一雞鳴，佢可以再開另一個戶口，但就冇晒啲粉絲，仲話真係激死佢咁話！
來源 source: http://hk.on.cc
|
鍾意就快D Share啦！
|
|
|