【錢銀實驗室】港式「共享經濟」下，係只准的士拒載，不准Uber接載。好在，創科局早就講明，UberEATS係合法，令人人都多咗一個隨時「炒散」嘅機會，人人做外賣仔。目前UberEATS嘅「外賣仔」，理念上係善用大家空閒時間，接單幫人送外賣，所以UberEATS平台係冇全職外賣仔。目前外賣形式分為三種，一種係電單車手，顧名思義，閣下一定要有電單車牌；至於單車、步兵，都係只要你有身份證就做得。UberEATS香港區總經理林灝哲（Horace）接受訪問時就講到，「你落街買個飯盒，可能都要近40蚊，但係如果你順便lunch Time送一次外賣，可以賺番你嗰個lunch返嚟。」Horace就透露，如果單接單，一般都做到時薪近100蚊收入。跟據UberEATS網頁所講，電單車外賣仔每單收入約40至50蚊，單車步兵收入都有約25蚊。記者實試送外賣，約10分鐘路程，賺到28.68蚊。保守計，來來回回一個鐘賺90蚊，一星期開六日工，每日開工八粒鐘，一個月可以有17,280蚊收入。Horace又提到，依家有過千名登記「外賣仔」，每個禮拜都有三、四百個送餐員，係平台度接外賣，雖然當中有七成係電單車手，不過「試仲有送餐員，每個禮拜做成20個鐘，我話你好似有電單車牌，你會唔會考慮下，不如你做架電單車做。佢話，唔使，我跑馬拉松嘅，反正我都係出嚟練下氣。」講到做外賣仔嘅貼士，步行送餐員，最好專注係一啲密度比較高嘅區域，同埋易行嘅區域，例如港島東區、九龍西。另外，當然要喺用餐高峰期Online就最著數，一般來講，上午11時至下午2時、下午6時至9時就最多單。記者：倪敏慧
攝影：李潤芳、陳家文
剪接：張展陶
編導：陳家文蘋果財經，關心你飯碗
http://fb.com/appledailyatm
|
鍾意就快D Share啦！
|
|
|