真係狼來了！吳京孭飛嘅《戰狼2》勢兇夾狼破晒內地票房紀錄，突破50億人仔，觀眾睇完好似打咗世界級興奮劑咁，當正佢係中國版Rambo！為部戲背水一戰賭命賭身家，一鋪返晒嚟，獲利坐底八億，仲剝埋唔少人棚牙，當初拍門科水冇人睇好，你愈話唔得，佢更加要得畀你睇，抵押埋間八千萬嘅屋湊夠1.5億人仔開拍。票房大收個個仆返轉頭話畀錢拍第三集，見錢冇開眼，佢話只會向當日支持佢嘅人報恩，唔支持嗰啲？Sorry嘞！係咁先！
斷韌帶踎唔到塔
喺呢個乜都要靠父幹、贏在射精前嘅年代，吳京抱住刀山去地獄去有何憾嘅熱血心態，確實夠晒勵志！佢成日講爛gag：「我叫吳京，唔驚嘛！」去到盡乜都唔驚，最驚冇機會！身為六屆武術大賽冠軍，打不死唔怕輸，傷痕當紋身，過百次受傷食飯咁食，你估釘書機釘大髀咩？六歲斷鼻骨、八歲穿頭、十四歲下半身險癱，最大鑊係十八歲右腳韌帶斷、腳踭裂、大髀都幾乎斷，廁所都踎唔到！喺《戰2》擔任導演、編劇、演員同武術指導四個崗位，都係以前唔怕蝕底做替身扮死屍、推軌放煙乜都學累積返嚟，正如佢嚟香港由零開始做新人，學廣東話學去茶餐廳叫鴛鴦，練功夫就跑去九龍公園，努力融入港人生活，雖然發展一般，但團火冇熄過。有次參與地震救災，靈機一觸，眼前救災嘅軍人成為《戰狼》系列素材，之後索性去軍隊體驗生活，為部戲學潛水、學揸坦克車，危險場面自己頂。
有人駁古反問點解戲內打不死，佢型到裂神回：閣下睇唔慣就咪鬼睇嘞，美國超級英雄戲可以打唔死嘅，點解中國人就要被打低先？來自北京嘅佢太真性情，有碗話碗，唔熟佢嘅以為佢寸過碼頭咕喱！情與義值千金，我Nuts哥親耳聽過，有人曾經甘詞厚幣撬過檔，佢拍晒大髀話係經理人帶佢出身，幾多錢都唔會走，有粥食粥，有飯食飯！你可以話佢戇居，但佢就係咁正義耿直，睇唔過眼更加會出聲。有次客串拍戲，見成村人等緊某小鮮肉埋位，佢直接拍門催開工，搞到對方即耍冧，從此準時！
豪氣老婆：賠了我養你！
近排內地謠傳佢拍《殺破狼》時被甄子丹打壓，仲作到話吳京要多謝對方當年睇唔起，咁大隻死貓點啃！佢哋喺《殺》一場後巷對打戲，真係使出真功夫，木棍都打斷幾條，識英雄重英雄，先至有呢場咁正嘅戲！宇宙最強恰人呢啲橋段，齋吹水當然過癮，但真性情如吳京，對甄子丹依然哥前哥後，畀邊個恰，恰過邊個，佢唔怕認！佢講過以前年少氣盛見到同門師兄李連杰，一句車埋去：「你唔係識飛咩？飛畀我睇吖！」李連杰話做足準備入行先做到第二個史泰龍，佢又懶得戚話：「準備？發得呢個夢就做到！」捱過跌過，先識得欣賞對方嘅修為，當正係偶像！
偶像仲有老婆謝楠！押埋間屋開戲多得老婆一句：「如果你的夢想不能實現，我們住那麼好的房子，也會一生遺憾，電影賠了我養你。」再一次證明，有個好老婆係好緊要！鐵漢柔情點止得尹揚明，娶得賢妻嘅吳京都有男人的浪漫，鍾意食豆腐火腩飯，唐詩宋詞出口成文，就連個仔個名都搞爛gag叫「吳所謂」！希望個仔唔執着冇所謂，但自己冇時停，話下個目標係讀MBA！好學又好打，吳京，你好嘢！
|
鍾意就快D Share啦！
|
|
|
