網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2017年8月27日 星期日

袁詠儀走辣同成龍「找數」 __,成龍,袁詠儀,

有Chilam喺身邊,靚靚學懂好多人生哲理!孔子同耶穌都講過,冤家宜解不宜結,何況一個係影壇大哥成龍,一個係有情有義女漢子「靚靚」袁詠儀?如果因為22 ...


有Chilam喺身邊,靚靚學懂好多人生哲理!


孔子同耶穌都講過,冤家宜解不宜結,何況一個係影壇大哥成龍,一個係有情有義女漢子「靚靚」袁詠儀?如果因為22年前合作電影《霹靂火》,冇辦法補錄對白,而面左左近四分一個世紀,無論邊個着邊個唔着都好,實在係除笨冇精!所以靚靚最近就透過星級調解員曾志偉,化解咗佢同成龍之間嘅芥蒂,唔只做到孔子嘅「其恕乎!」耶穌嘅「饒恕七十個七次」,仲「壓力減少咗,又維持到關係, 咁就雙贏」

少年得志兩捧影后

袁詠儀係聰明女嚟,如果唔係當年都唔會選完港姐,拍咗幾套劇,就被人發掘咗去拍戲,仲要一拍就攞最佳新演員,再連續兩年攞影后,好演員要有好嘅觀察力,試問靚靚又點會唔識睇人眉頭眼額?

但正所謂「少年得志大不幸」,靚靚23歲女已經連捧兩屆影后,係「影后s」有「s」,眾數嚟㗎!未攞過嘅係唔會明白嗰種「獎獎在手,天下我有」嘅傲視同群感覺,但可以學靚靚「表哥」黃子華喺《娛樂圈血肉史2》咁代入呢種心理:好多人問我拍戲攰唔攰?推戲仲攰由今日開始,我唔會再角逐影后,因為冇挑戰性,我會角逐影帝!

人就係咁,發展太順利,一唔為意就會意氣風發,氣燄大咗自己都唔知,靚靚都係人,攞完第二座影后嘅佢,即刻成為成龍電影嘅女主角,畀着任何一個都會飄飄然,加上靚靚本身直腸直肚,又貴為影壇新寵,分身乏術,喺無心嘅情況下失場而令成龍唔開心,如果唔係成龍去年喺內地節目怒斥有演員耍大牌:「看你幾時完」,有人推斷係講緊袁詠儀,係真唔係呀?所以靚靚自己都要解開呢個廿年不和之結!

醒目識搵志偉搭路

冰雪聰明嘅靚靚其實睇緊幾時緣分到!好唔容易終於等到日前成龍、曾志偉搞飯局,於是自告奮勇問志偉可唔可以預埋佢,主動搵機會同成龍化解心結!做錯嘢肯承擔,喺今日嘅香港實在難能可貴,靚靚唔考慮玩賴皮,而選擇勇敢面對,除咗係受到好好先生張智霖(Chilam)感化,適度減辣外,身為人母嘅佢,亦藉此向囝囝「魔童」示範做人處世嘅寶貴一課,可謂一石幾鳥!

眾所周知,靚靚除咗生勾勾嘅咯咯雞之外,可以話冇有怕!就算同靚仔Chilam拍拖、結婚、生仔,都一直御夫有道妻管嚴,Chilam忠心之餘,就連傳過緋聞的女星許秋怡、佘詩曼等亦對靚靚生敬畏之心,你就知佢管理手腕幾厲害!

至於靚靚識搵志偉做中間人,證明佢聰明,有留意圈中大小事,事關早年某女諧星以氣燄狂噴多位記者,結果之後嘅連串採訪活動,班記者都唔騷擾佢老佛爺雅興,直到呢位女星知衰,叫導演老公請志偉出面說情至得到解決,所以你話靚靚揀老公叻,揀和事老又叻,佢唔拍戲,係咪應該去做Casting呢!


來源 source: http://hk.on.cc
鍾意就快D Share啦!