Regen認加工進化楊思琦2.0
歌手張惠雅（Regen）以醫學美容院代言人身份拍廣告，見她鼻樑高、下巴尖及胸部豐滿，和初出道時的鄰家女孩樣貌及身形不同，惹來「寓工作於整容」疑雲！驟眼看她與楊思琦「難分真假」，連Regen亦認撞樣，直呼思琦做「家姐」。
28歲前HotCha成員Regen，自3年前組合拆夥後作單飛發展，現為無綫藝人的她日前為醫學美容院拍攝廣告，見宣傳照特寫其變高的尖鼻，下巴則呈三角形，身穿低胸裙的她胸部豐滿不少，跟幾前年的圓鼻頭、梯形下巴及iPad胸有「微妙的變化」，一洗「o靚妹味」，成個樣Sharp晒。最神奇的是她跟前港姐冠軍楊思琦有8成似，若她擁有思琦的34C豪乳，非現有的32B胸，分分鐘被認錯為「巨胸思琦」。
「叫佢做家姐」
Regen昨日接受電話訪問時直認與思琦似樣：「唔係第一次被人話似思琦，好多時啲人眼甘甘望住我，想問我時，我就搶先同佢講我係Regen。（你覺得似唔似？）似o架，尤其個酒凹，所以我都會叫思琦做家姐，不過最唔似係我個胸冇佢咁勁囉！」
問Regen「變」成楊思琦是否接受「微調」？她說：「我係試做咗療程，但唔係整容嚟嘅。廣告特寫我個鼻係想表達我皮膚有彈性。」問到可會考慮整容？她說暫時未能接受植入式美容，笑言如要隆鼻，早在兩年前已做：「嗰次我撞車撞到鼻骨裂咗，連鼻都歪埋，我做咗矯形手術，都後悔使咗幾萬蚊，冇叫個醫生順便幫我整高個鼻。」至於下巴尖了，她解釋只是年紀增長，加上勤做運動踢走Baby Fat。
談及上圍升Cup終可露事業線，Regen承認近年做了「手腳」令胸部變大：「我讀緊中醫，發現原來穴道按摩係可以令個胸變大，我幫自己按咗成年，真係得咗，雖然Cup數未變，但真係脹咗。我諗如果成功，就將呢個方法發揚光大益吓啲姊妹，唔使冒險做手術。」
儲50萬學中醫
現時修讀中醫的她，計劃明年到內地全職讀5年中醫課程，不過先要解決經濟問題，因學費及生活費要逾50萬元。她無奈說：「今次做代言有6位數，但距離我嘅目標仲好遠，希望以後啲廣告好似今次咁自動嚟搵我啦。」她又稱現時沒有經理人，就算怕醜都要學識硬着頭皮抓撈，最期望有女性用品及運動用品找她合作，讓她早日儲夠錢讀醫。
文：音樂組
|
鍾意就快D Share啦！
|
|
|
