黃家一門四美，大家焦點之前集中晒喺心穎BB身上，其實大家姐心美更具可觀性。
35歲嘅ViuTV台柱黃心美(Scarlett)，06年喺加拿大回流返香港簽約做歌手，點知歌手夢碎，之後去咗台灣，喺2010年同拍拖五年嘅男友Thomas，不過呢段婚姻維持咗唔夠五年，喺加入now TV工作之前，喺2015年正式結束呢段異地婚姻。
不過回復單身嘅Scarlett，身價冇因為而貶值，除咗事業發展越嚟越順利，廣告、司儀嘅工作都接到手軟，仲俾網民捧為「宅男女神」，甚至被封為娘娘！
【女乜鬼神呀，我今年都30有6】
不過如果你以為Scarlett喺鏡頭後都係一個嗲聲嗲氣嘅女仔，真係大錯特錯！查實Scarlett私下嘅性格好Man，絕對係一個外柔內剛嘅女仔。日前Scarlett接受《蘋果》專訪，佢哈哈大笑話：「其實我冇掩飾過我係一個『佬』，可能我多數做啲life style、高級品味生活嘅節目，冇俾機會我去展示好『佬』嘅呢一面，所以咪呃得吓人，以為我係娘娘！」
對於娘娘呢個稱號，Scarlett話：「好耐前之前有人咁講，但係自己又唔覺，呢啲只不過係虛名，女乜鬼神呀，我今年都30有6，講真，我唔需要呢啲咁嘅名，做咗咁多年，有人記得我個名已經好開心，嗰啲一姐朵、女神朵，可以唔使，但係我控制唔到人哋咁講，唔會同人哋糾纏呢兩個字，由得人哋點講！」
【太早結婚：人又錯timing又錯】
就算你有你否認，但總係有唔少人覺得娘娘手下有唔少兵仔，感情生活多姿多采，但係事實上，Scarlett喺2015年同台灣老公離婚，結束呢段維持咗5年嘅婚姻，佢話當時有唔少人問過點解會咁早結婚，Scarlett話：「我嗰陣覺得啱嘅時間遇到啱嘅人，但係o依家諗番，原來係人又錯、timing又錯，如果將來再結婚，都係一個衝動！」
正所謂「一朝被蛇咬，十年怕草繩」，Scarlett話雖然已經走出陰霾，但係多多少少令佢對愛情都冇所改變：「瀨過啲咁甘嘅嘢，咪慎重啲，就係呢個經歷教曉咗我，離咗婚之後都有拍拖，又係同一個台灣嘅男仔，我真係唔怕再死多次，唯一唔同係，我以前係外貌協會，但係呢個男友冇樣睇，不過佢對你好好，好到唔知點形容，最後拍咗個幾月分咗手，我覺得自己好犯賤，佢對我太好，好到頂唔順，所以都係做番以前犯賤嗰條路！」
【我總有我嘅市場，唔使擔心】
o依家娘娘嘅假面具被揭穿，Scarlett有冇擔心性格太強而嚇走追求者？點知佢話：「我同你講，啱啱好係相反，好多男人鍾意man啲女仔，太嬌嗲嗰啲反而唔鍾意，我總有我嘅市場，唔使擔心。我係完全唔嗲得，一嗲就起雞皮！」佢仲自爆話：「我唔鍾意俾男人追，見到啱我會自己追，最好係一見鍾情嗰種，我第一眼會見到啱唔啱自己，當然，如果唔鍾意會落閘，無謂浪費時間。」
唔知Scarlett追男仔嘅方法又係點呢？佢好坦白話：「細個嗰陣易啲，遇到一個心儀嘅對象，咪講句我諗我鍾意你，女仔真係好簡單。如果佢對你有意思，好快可以搞得掂，反而越大越難撞到個啱心水，真係自己鍾意咪自己爭取！」
採訪：何慧斯
髮型：Cedric Tsang@Nova Hair Nail
化妝：Dera Tse
場地提供：浜滝Hamataki
| 攝影：沈健程 | | |
| | | |
| |
|
鍾意就快D Share啦！
|
|
|
