「港姐殺手」袁偉豪同岑杏賢分手大半年，上月公開認愛細11年嘅張寶兒，兩人去非洲拍節目時擦出愛火花，袁偉豪更感激女友唔嫌自己係uncle。兩人拍拖短短幾個月，感情一日千里，原來袁偉豪已經同女友去旅行戀戰沖繩，被讀者李小姐透過「爆相爆片」分享。
李小姐接受電話訪問表示，前日（17日）下晝6點幾，喺沖繩美國村見到袁偉豪同女友行街，同行仲有一位男友人：「佢哋三個人企咗喺度一陣，之後見佢哋過對面馬路，會合一個女仔朋友，過程中袁偉豪有同男仔傾偈，但身邊女友就密密撳電話。」
問到袁偉豪同女友有冇表現sweet sweet？李小姐表示：「佢哋冇拖手，女友只係默默跟佢身後。我本想影正面相，但佢望到我，好似想叫住我咁，我就走咗啦。」從李小姐提供嘅相片所見，着白色長袖衫戴超嘅張寶兒全程做低頭族，兩人手上都未見戰利品，似乎係去美國村行吓兼開餐。
袁偉豪上周六仲喺香港出席活動，相信佢同女友都係啱啱到沖繩，就已經被讀者「爆相爆片」，佢哋喺社交網都冇透露行蹤，似乎想低調保護戀情，對於被讀者「爆相」戀戰沖繩，問到係咪想加深了解增進感情？袁偉豪回覆傳媒表示：「其實我嚟呢度係自己休息嘅，因為做嘢忙咗9個月，見有少少空檔，所以就過嚟呢邊搵朋友，我係同Bowie（張寶兒）一齊過嚟呢度，其餘我就唔講嘞。」
袁偉豪仲不吐不快：「我唔係好喜歡香港人嚟到呢度，見到我哋即刻用手機影，唔好同我講食得鹹魚抵得渴，我絕對唔認同，如果想留紀念影相我絕對冇問題，但我唔鍾意o依家啲人偷影，好冇禮貌，完全侵犯我私癮，呢個矛盾得嚟好難妥協，唔好因爲我係公眾人物就可以被人咁影，調轉我影你擘大口食麵，你會點呢？將心彼己。」
|
鍾意就快D Share啦！
|
|
|