04年港姐亞軍朱慧敏（Queenie）前年怒撇偷食男彭懷安（Eddie），當時嬲到震嘅佢決定取消婚約，但分手後兩人卻停不了被撞破出雙入對，惟依然死口唔認復合。
但紙係包唔住火，大前日兩人蜜遊到東京過二人世界，晨早8點幾搭廉航展開愛之旅程，到達成田機場後買車飛再斷正，被《蘋果》讀者劉先生透過「爆相爆片」分享，似乎兩人掟煲唔掟蓋，轉玩地下情。
讀者劉先生喺電話表示，大前日（19日）搭HK Express UO844早機去東京，咁啱與朱慧敏同Eddie同一班機，雖然只影到兩人嘅側面相，但劉先生話：「肯定係佢哋呀，我同女友一認就認到係佢哋，兩個上機帶住超坐後排。我哋上咗機好耐，佢哋差唔多係最後先上機，我估係怕俾太多人認到啦，但佢哋兩個都咁高，又帶晒超，因為我住將軍澳都撞過朱慧敏幾次，所以認得佢。」
從劉先生提供相片所見，兩人排隊買車飛出市區，朱慧敏求其用橡筋紥起頭髮，一副未瞓醒嘅樣，着紅tee用紅喼同紅黑色背囊，先發現原來佢咁鍾意紅色。問到佢哋有冇表現避忌？劉先生話：「冇，兩個有講有笑，但冇拖手，好耐先見佢哋落機，全程一齊行無避忌呀；排隊過關嘅時候，佢哋如入無人之境，一路有講有笑無避開過人，過咗關之後，佢哋就買飛出市區啦。」
記者聯絡朱慧敏同Eddie問係咪復合？兩人都沒有回覆。
| 朱慧敏同彭懷安孖住去旅行被發現，係咪復合轉玩地下情呢？（讀者提供圖片） | | |
| | | |
| |
來源 source: http://hk.apple.nextmedia.com
|
鍾意就快D Share啦！
|
|
|