70、80年代做過演員、播音及舞台劇藝人嘅張之珏，74年曾與汪明荃合演《清宮殘夢》，飾演光緒皇帝。張之珏喺03年移居新西蘭，今年為賀恩師鍾景輝(King Sir)80歲壽辰，專誠返港為舞台劇《小城風光》執導。
張之珏最近亦有為d100《嚤囉街高談闊論(復刻版)》做嘉賓，其網頁今日貼出張之珏噚晚意外跌傷嘅相片，透露佢乘扶手電梯時唔小心失足倒地。見張之珏頭部包住紗布，頸後仍見血痕，連衫恤領都留有血漬。不過見佢仍然好清醒，對住鏡頭微笑。而網頁留言張之珏已無大礙，仲話：「他說多謝大家關心。」今晚佢亦堅持繼續做節目，真係非常之專業。
《蘋果》今日致電張之珏，電話中聲音非常響亮，透露噚晚近11點喺銅鑼灣港鐵站坐電梯時遇到意外，佢話：「地鐵跣親，爭啲就可能死咗，當時電梯喺上緊，人向後翻，腦向後撞，條頸好易斷，好似之前朗豪坊意外咁。」當時張之珏立刻由救護車送入醫院，最後縫咗4針，問到有冇後遺症？佢一派樂天咁話：「唔知，或者死都唔定，我唔care，但驗咗冇事，唔係都唔放我走啦。我今日仲做節目，好精神。(當時有冇朋友係身邊？)冇冇冇，唔使㗎呢啲，死咪死囉，我完全唔緊張呢啲嘢，但都多謝大家關心。」
不過，張之珏仍不忘為舞台劇宣傳﹕「我仲要做埋個舞台劇㗎，今次好成功，十場以外，仲會加開多兩個日場同一個夜場，絕不加場㗎嘞。」
來源 source: http://hk.apple.nextmedia.com
|
鍾意就快D Share啦！
|
|
|