以前做女星，想紅要晒事業線，依家男星想彈起，就要賣弄人魚線！之唔係講緊無綫近排嗰套《使徒行者2》「天堂哥」袁偉豪囉！佢三日唔埋兩日就除衫晒肌、露股，搞到男男女女都對佢嗰個渾圓有肉嘅「八月十五」印象難忘！喺呢個係人都晒肌嘅年代，「天堂哥」唔止晒人魚線，仲行埋股惑，抵佢近年事業同愛情兩得意！
捱足20年 由四線做起
其實袁偉豪捱到今時今日叫做有人識，嗌得出個名，真係吃過唔少苦，佢16歲就出道，當年學歷只有中三嘅佢，因為拍荳奶廣告，被人叫做「荳奶仔」！同「牛奶仔」一樣，好有毛都未出齊嘅感覺，但男人唔Man，真係搵你要！結果做過人體素描模特兒、喺啲港產片撈吓閒角嘅佢，浮浮沉沉10年，終於的起心肝操肌，參加2007香港先生選舉，以透視泳褲引得一眾女評判「依嘩鬼叫」，最終成功捧走冠軍榮銜，但咪以為咁就從此一帆風順，佢之後喺無綫劇由三線尾、四線頭藝人做起，做到舊年《鐵馬戰車》先叫做嶄露頭角咋，屈指一算，距離出道已經二十個寒暑！
試問人生有幾多個十年呀！袁偉豪應該慶幸出道早，加上肯去練大隻，無論喺《使徒2》剝衫，定係《城寨英雄》入面嘅吊帶恤衫西褲「牙佬」Look，都掩蓋唔到佢嗰副好似要爆衫而出嘅吸睛Body，皆因佢集健身界嘅「四大武器」麒麟臂、人魚線、狗公腰同愛之把於一身，唔只吸咗大批男同志粉絲，仲令佢勁旺女人緣！同拍拖三年嘅前度女友岑杏賢分手半年左右，又同現任張寶兒開始，成為咗「一年容易又拍拖」嘅典範！
內外兼修 走紅冇忘本
但睇嘢唔好咁表面，袁偉豪之所以唔愁冇女友，全因為佢內外兼修！除咗操Fit外面個殼，佢裏面副偈都好得！自知學歷輸蝕嘅佢，由初初入行已經禮貌周周，到依家叫做彈起咗，都冇話目中無人、不可一世懶巴閉咁，至少Nuts哥啲記者朋友對佢都冇乜負評，你可能會話：「佢扮嘅啫！」但係早兩年歐陽震華（Bobby）食食吓飯，突然反白眼、抽晒筋，袁偉豪即時入廁所洗手，再將自己手指畀Bobby咬，以免佢咬到條脷，憑呢單嘢就足以證明佢係好仔一名！對住麻甩佬，佢都可以諗都唔諗，無私奉獻出寶貴手指，你估對住心儀女性，佢可以攞啲咩出嚟畀女咬？啲女唔冧就有鬼！
咁都未算，早排袁偉豪喺布拉格拍外景，仲展露咗一手專業攝影師嘅功架！要知道，男友識影相，女友定必加分！又難怪有人「葡萄」袁偉豪桃花咁旺，皆因佢哋唔明溝女最重要就係內內外外、出出入入都照顧周到，咁先會「啲女畀你溝晒」，人哋女死女還在，你吹得佢脹咩？
世上既然有句說話叫「女人是男人的學校」，袁偉豪離開舊校，隔6個月先轉新校，即係小六畢業，過咗半年先去讀中一，又點算極速換畫、唔尊重前度？當然，期間有冇唔向學校坦白，放學後私下去讀補習學校，呢啲就另作別論！
|
鍾意就快D Share啦！
|
|
|