日本前世界拳王河野公平，毫無疑問係曹星如職業生涯中，面對最強嘅一個對手。河野今年36歲外號「Tough Boy」，此稱號同佢屢敗屢戰、不屈不撓嘅強韌意志非常合襯。河野職業生涯戰績為33勝10負1和，無論經歷過多少次失敗，都能奮起再戰，並曾三度成功衞冕WBA超蠅量級世界拳王金腰帶。雖然年紀已不輕（大曹星如6年），但河野經驗豐富實力強橫，Rex要過呢關絕對唔易。
河野曾經講過，希望於9個回合內解決曹星如，如果呢個人囂張跋扈得把口，當然可以不理，但河野為人內歛沉實，呢番說話就更形危險。河野出道接近18年，於拳壇地位非輕，究竟佢係一個點樣嘅人？背景又係點？
當初河野出道，原因非常戲劇性，原來佢係睇咗一本書，先至踏上拳擊舞台。話說河野喺高校時代，本來係玩田徑嘅，不過有次佢睇咗一本名為《6個月內成為職業拳手》嘅「秘笈」，從此就愛上拳擊運動，19歲開始跟隨日本最佳訓練員高橋智明學拳，從而成為一代拳王。當然，河野公平爸爸亦應記一功，佢最初反對個仔打Boxing，直到睇住河野公平喺處子戰畀人打咗一身黯然敗陣，仲依然唔肯放棄死命練習，於是把心一橫，索性連個客廳都改埋做訓練場地，造就阿仔走向成功。
河野公平有個外號叫「和製帕克奧」，原因係佢個樣同自己個偶像、菲律賓拳王帕克奧（Manny Pacquiao）有幾分神似，但係河野比起外向嘅帕克奧，可以話係慳家宅男一個，渡邊拳館會長渡邊均爆佢「又唔飲酒，又唔出街食飯，1個月使唔到2、3萬日圓（約1,386至2,079港元）」，講出嚟都冇人信。或者專注拳擊嘅河野公平，真係可能慳到都唔奇，事關佢屋企離拳館好近，搭車錢都慳埋，完全可以過啲苦行僧生活。唯一可以令佢大使嘅地方，除咗家庭就係得旅行、浸溫泉兩樣，因為河野得呢兩種嗜好。
講到家庭，河野公平有「勝利女神」護身，就係老婆南芽衣，日本著名民歌歌手兼作曲家、演員南寛康個大女。南芽衣婚前係個Model，2013年經熟人介紹，認識河野公平開始拍拖，兩年後就拉埋天窗。河野一直將芽衣叫做「勝利女神」，原因係呢個公認嘅美人妻，除咗喺飲食方面照顧周到，仲以瑜伽教練身份提供一啲加強柔韌性嘅建議，對河野公平好有幫助。
東網體育同你追實體壇每個精彩時刻！
http://bit.ly/2ecTF2A
|
鍾意就快D Share啦！
|
|
|
