【《蘋果》專訪】當年陳志雲的「迷雲黨」成員寧進，因廉署「威遠行動」被無綫棄如敝屣，在無綫十年期間都被投閒置散，結果寧進離開，此處不留人，自有留人處，寧進轉行做地產經紀，用七年時間大翻身，現年36歲的他於高峯期擁六、七層自置物業，今年初更擲1,100萬買入半山一個單位！
陳志雲於七年前在無綫擔任業務總經理時，捲入廉署「威遠行動」惹官非，案件糾纏多年，今年3月陳志雲和密友叢培崑上訴得直。當年同被拘捕的「迷雲黨」成員、在《志雲飯局》節目負責捧餐的寧進，雖然最後獲廉署撤銷擔保，但卻被無綫解除合約。當年30歲的寧進，毅然轉行做地產經紀，終於闖出一片天，由初入行做屋邨地產舖做到中環半山，由住屯門公屋做到高峯期有六、七層自置物業，今年初更擲1,100萬購入堅道一個700呎實用單位，正式由屋邨仔升呢上半山。
企街搵客
現於地產公司擔任經理的寧進，有一間屬於自己的辦公室，在他帶領下的員工，每月都賺到6位數薪酬，回望過去的寧進說：「其實無綫嗰時唔要我，我好唔開心，不過諗深一層，自己嗰時都30歲，仲喺電視台行行企企都唔係辦法，啱啱有朋友喺紅磡做地產，細個阿媽教落做人一定要有瓦遮頭，朋友就話可以邊做邊考牌，跟住就開始做咗地產經紀。」
由藝人轉到地產經紀，寧進初期未能適應，諗過劈炮唔撈：「以前都算係藝人，出入有人招呼服侍，初初做地產，要企喺條街搵客，新盤開，又要同其他agent搶客，雖然有底薪，但比起我之前開泳池公司、酒吧生意，始終爭一大截。」幸好寧進沒有放棄，在肯捱肯努力之下，最後由屋邨仔變住半山。四年前寧進成家立室，迎娶初戀情人，囡囡於去年出世，他說：「我成日同人講，碩士、博士都不及人事，我天生鍾意講嘢，鍾意識朋友，咁啲客買完樓，你問吓佢哋做唔做到按揭，多啲關心吓佢哋，只要同佢哋做咗朋友，佢嘅朋友就自然成為你嘅朋友，買樓又會搵番你。」
睇好樓市
經紀雖然底薪不高，但勝在佣金豐厚，多勞多得，其後寧進開始有本錢買樓：「只需用呢嚿錢去做首期，之後租畀人等人幫你供樓，供樓壓力就會減輕好多。如果係打工仔，想儲首期真係儲到天光都未必儲到。」入行七年的寧進，眼看樓市雖然經歷金融風暴、政府加推辣招，但樓價不跌之餘反而每每破頂。曾擁六、七層自置物業的他說：「啲人成日話個市就冧，呢句說話我都聽咗好多年，啲所謂專家，又話嚟緊會加息，又話政府有辣招，老實講，呢啲報道害咗好多人，因為以我經驗，就算跌市，都肯定追唔番升嗰一浪嘅升幅，嗰時唔上車，追唔番，中途落咗車，又係追唔番。我哋地產佬成日都講，唔怕入錯市，最怕你唔敢入。」
採訪：王梓嫚
|
鍾意就快D Share啦！
|
|
|