早排森美主持旅遊節目大獲好評，網民反批杜如風騎呢，百貨應百客，反而睇佢做主持，令我Nuts哥有所啟發：做人要做杜如風呀！別人笑佢太瘋癲，我笑他人看不穿啫！唔係學佢講嘢要慢幾拍，係學習吓佢凡事放輕鬆、唔好急慢慢嚟嘅態度！
着住睡衣浸溫泉拍節目，杜如風畀人插到開巷，話影衰港人！佢去咗N次日本，當年放棄去加拿大讀大學、攞到每年得幾個Quota嘅獎學金入讀日本一級學府，你估佢住過日本咁多年，真係唔知浸溫泉係點咩？佢唔想賣肉，事前又問准溫泉負責人，喺節目又聲明係為拍攝效果，叫大家唔好有樣學樣，咁都要插？學佢咁講：Why so serious ？都係娛樂大家，睇得開心啫！
Shopping快如瘋 16歲碌爆卡
世上多幾個杜如風，戾氣都少好多！以佢古靈精怪、講嘢慢幾拍嘅吊兒郎當風格，做談判專家或收數佬都應該好出色，甚至做外交大使都冇問題！問你點解要跳樓，佢問得嚟聽得嚟，乜波鐘都揼走晒，想跳落去嗰度氣都蝕晒喇！收數？都未必要靠惡，佢16歲已經碌爆卡，點還清條數，清楚過你！笑騎騎軟皮蛇，講嘢慢吞吞又一舊舊，唔笑死都煩死，唔使出刀出槍，條數即刻一筆清！美國總統Donald Trump都應該要諗諗，搵佢同金仔講數射少啲核彈，應該有得傾，大家都係購物狂同咁貪靚，以佢咁吹得，齋講買嘢都講到天光，分分鐘金仔仲畀佢拍番輯《風行全北韓》！
講嘢慢吞吞，但買嘢快過打針！自爆為購物狂嘅佢，成日喺節目講Shopping熱點，又晒過話有一千對鞋，即刻被網民封為「世界級港女」！咁都叫港女？唔少女士閒閒地都廿對鞋，佢係藝人兼且仲要係購物狂，有過千對有幾奇？況且節目開宗明義係潮玩，集集同你講日本歷史，仲唔熄機咩？做得主持都要有說服力，冇食過冇玩過，最遠只係去過深圳，正正經經齋背稿介紹，真係勝任？攬住男神梁朝偉個紙牌周街走，用搞笑方式介紹當地結婚熱點，都係想你笑住吸收資訊。
港女自食其力 拍拖都AA制
同港女最唔同，係佢自食其力！點買都好，即使拍拖都AA 制，齋係呢點，好過唔少話有樓先有高潮、收兵搵着數嘅港女！阿爸杜惠東嘅老友粒粒巨星，但佢從來冇「靠父幹」搵着數，拍節目一腳踢，否則叫阿爸幫佢碌人情卡，食飽飯等運到使乜嘥腳骨力？咪以為佢講嘢低低哋就係頭腦簡單，拍到病就竟然順勢拍埋入院過程，教埋大家喺外地入院要點做，識執生！就算舊年阿爸啱啱過身，佢都照原定計劃去拍節目，佢話：「因為老竇睇住，要振作！」夠晒盡責喇啩！
你有你講，佢一笑置之，永冇對罵玩潑婦罵街，照樣喺巴黎鐵塔下，絲巾笠頭La tour eiffel咁唱伍詠薇嘅《失落於巴黎鐵塔下》。明知不能贏得全世界，不如瘋行全世界，自得其樂！依家個個怨氣衝天，有乜唔妥唔順超，拍片影相放上網公審，齋講搭港鐵，關愛座變批鬥座，坐親都幾乎要健康申報咁滯，為乜？放鬆啲香港人！
|
鍾意就快D Share啦！
|
|
|