「鼎爺」李家鼎同譚玉瑛拍完兩輯《阿爺廚房》，在節目中展示失傳家常菜式，令觀眾大開眼界。鼎爺爆紅，9月就同朋友喺銅鑼灣開咗間私房菜，未開業已經爆到「嘭嘭聲」，booking去到明年2月，真誇張！
係咪咁好食，真係要試過先知。
麥玲玲自掏腰包book咗間房話要試吓，$888-$2888一位，佢就揀咗中間價$1288，計埋加一，埋單都要萬七蚊一圍。玲玲姐話﹕「我同鼎爺合作過拍廣告，見佢炒麵都相當好，真係好難book㗎，等到頸都長。」
等足兩個月，玲玲姐日前終於有機會一嚐鼎爺手藝，仲約埋林作、裕美同蔚雨芯一齊試菜。佢哋見到食譜一道「古法東星化成龍」非常好奇，林作笑笑口話﹕「我懷疑呢個名應該係有少少用影壇大哥，要化咗佢吖嘛，唔知係咪有秘史？」仲有一道叫「紫氣東來」，即係生炒排骨，侍應哥哥解釋﹕「其實都係意頭名啫。」
8點20分，第一道菜正式登場，「前菜四食」係由左上角叉燒開始食起，現場有專人講解製法，咁鼎爺呢？房裏面有部電視機，播放緊鼎爺煮嘢食，玲玲姐見到鼎爺咁辛苦，就話﹕「拍幾條差唔多嘅片循環用就OK啦。」每次上菜，Rainky同裕美都係相機食先，因為每碟嘅賣相真係唔錯，林作就經常口花花撩女仔，得知裕美啱啱同識咗個混血男友，佢即好自信咁話﹕「我英文都好好㗎，有男朋友嘅女仔我都ok。」
食到第七道菜，鼎爺終於登場！鼎爺帶領眾人扑爛隻「阿爺乞兒雞」，佢話﹕「呢隻乞兒雞經過好多年嘅改良，用新舊荷葉包雞，再加埋上海大頭菜，外面再包酒釀，隻雞有酒香又有荷葉清香。」原來鼎爺開業後一直都冇放過假，唔使開工就會落場，未必每道菜都會親自煮，但廚房就會依足佢啲秘方。鼎爺嘆氣話﹕「瘦咗13磅呀！每晚都有三、六個人嚟踩場，四個大廚就係要睇我嘅蝦仁炒蛋，我煮畀佢哋食完，令佢哋冇嘢講！(舉起手指公)」
跟住鼎爺又要忙住去另一圍枱款客，再食埋「新舊荷葉飯」同「杞子圓肉紅棗燉桃膠糖水」，九道菜食晒，大家覺得邊道最啱心水，邊道要改善？想知就立刻睇片
採訪：嵐山、吉吉攝影：沈健程
更多娛聞，喺晒《娛果》
http://fb.com/appledailyent
|
鍾意就快D Share啦！
|
|
|